Navigation

Inhaltsbereich

Pesta da chauns tar vulps en il Grischun

  • Erste Mitteilung
  • Neuen Beitrag einfügen
Sco gia en il chantun Son Gagl ed en il Principadi da Liechtenstein èn vegnidas cumprovadas las ultimas emnas er en il Grischun infecziuns cun il virus da la pesta da chauns tar numerusas vulps da las regiuns da la Val dal Rain da Cuira, da Tavau e da la Mesolcina.

Ils animals ch'èn daventads grevamain malsauns pervia da questa infecziun virala, han stuì vegnir sajettads u èn vegnids chattads gia morts. Animals malsauns dattan savens en egl pervia da lur cumportament insolit (mancanza da tema, els sa mussan er vi per il di en vischinanza d'abitadis). Sch'i vegnan observads cas da suspect, èsi raschunaivel d'annunziar quels al guardiaselvaschina cumpetent.

Virus fitg contagius
La pesta dals chauns è ina malsogna virala che attatga en spezial chaunids e mustailids (chaun, vulp, tais, fiergna, telpi, mustaila). En cas da la pesta da chauns sa tracti d'ina malsogna fitg contagiusa ch'è per regla mortala per ils chauns. Ella vegn transmessa tras in contact direct cun in animal infectà u en moda indirecta sur il pavel, sur l'aua u sur objects ch'èn smerdads da secrets u d'excrements d'animals infectads.

Transmissiun betg exclusa
Ina transmissiun dal virus da la pesta da chauns d'animals selvadis sin chauns da chasa n'è fin ussa betg vegnida observada, n'è però er betg d'excluder. Infecziuns cun il virus da la pesta da chauns pon vegnir evitadas tar chauns cun als vaccinar ad ura e regularmain. La gronda part dals chauns è per il solit vaccinada cunter la pesta da chauns. A las possessuras ed als possessurs da chauns vegni recumandà da laschar controllar tar lur chaun – en enclegientscha cun la veterinaria u cun il veterinari – l'effect profilactic da la vaccinaziun cunter la pesta da chauns. Umans na survegnan betg questa malsogna.

Fotografia:
-
©Karl-Heinz Jäger


Infurmaziuns (a partir da las 10.00):
- dr. Adrian Arquint, inspectur da chatscha, uffizi da chatscha e pestga, tel. 081 257 38 92, e-mail Adrian.Arquint@ajf.g.rch
- dr. Rolf Hanimann, veterinari chantunal, uffizi per la segirezza da victualias e per la sanadad d'animals, tel. 081 257 24 11, e-mail Rolf.Hanimann@alt.gr.ch


Gremi: uffizi da chatscha e pestga / uffizi per la segirezza da victualias e per la sanadad d'animals
Funtauna: rg uffizi da chatscha e pestga / uffizi per la segirezza da victualias e per la sanadad d'animals
Neuer Artikel