Dumengia, ils 10 da zercladur 2018, han lieu las elecziuns da la regenza e dal cussegl grond en il chantun Grischun. Ils resultats vegnan actualisads la dumengia d'elecziun mintga ura en l'internet sut www.gr.ch ed er communitgads sur Twitter (#WahlenGR18).

Dumengia, ils 10 da zercladur 2018, a chaschun da las elecziuns dal cussegl grond, vegnan las votantas ed ils votants dal Grischun ad occupar da nov ils suandants mandats:

• deputadas e deputads en il cussegl grond (parlament chantunal)
• suppleantas e suppleants dal cussegl grond

Las elecziuns dal cussegl grond valan per ina perioda d'uffizi da 4 onns (che cumenza il 1. di da la sessiun d'avust 2018). La repartiziun actuala dals 120 sezs en il cussegl grond sin ils 39 circuls electorals – calculada tenor la populaziun permanenta – pudais Vus consultar qua.

Dumengia, ils 10 da zercladur 2018, han lieu ensemen cun las elecziuns dal cussegl grond er las elecziuns da la regenza per la perioda d'uffizi dal 1. da schaner 2019 fin ils 31 da december 2022.

La chanzlia chantunala dal Grischun publitgescha dumengia, ils 10 da zercladur 2018, a partir da las 12.00, resultats intermediars da las elecziuns sut www.gr.ch. Circuls electorals, dals quals ils resultats da las elecziuns dal cussegl grond èn avant maun, survegnan en l'internet in document da PDF che cuntegna ils nums da las candidatas e dals candidats elegids. Ils resultats da las 108 vischnancas davart las elecziuns da la regenza èn cumpilads en in'unica datoteca da PDF. Ils resultats intermediars vegnan actualisads mintga ura fin che las elecziuns èn a fin. Sin Twitter communitgescha il servetsch da medias dal Grischun (account "Mediendienst KtGR") ils resultats il di d'elecziun cun #WahlenGR18.

In eventual segund scrutini per las elecziuns da la regenza e dal cussegl grond è previs per dumengia, il 1. da fanadur 2018.


Infurmaziuns:
Walter Frizzoni, vicechancelier, tel. 081 257 22 22, e-mail Walter.Frizzoni@staka.gr.ch  


Gremi: chanzlia chantunala
Funtauna: rg chanzlia chantunala