Navigation

Inhaltsbereich

Communicaziun da la regenza dals 31 da matg 2018

  • Erste Mitteilung
  • Neuen Beitrag einfügen
La regenza ha approvà l'ediziun nova d'in project per garantir il salvament da ruinas en il chantun Grischun. Ultra da quai ha ella dà glisch verda per ina nova basa tecnica forestala a Trin ed ella ha deliberà ina contribuziun chantunala supplementara per ina via d'avertura dal guaud a Claustra.

Cuntinuar cun il salvament da ruinas
L'onn 2007 aveva la regenza approvà ina summa da project da 4,73 milliuns francs da la finanziaziun speziala (FS) da la lottaria naziunala per garantir il salvament da ruinas en il chantun Grischun. Tranter ils onns 2007 e 2017 han uschia pudì vegnir concedids meds finanzials a 32 projects. Tut ils projects èn vegnids elavurads, survegliads ed exequids da persunas spezialisadas cumprovadas. Las duas etappas da project vertentas 2007 fin 2012 e 2012 fin 2017 han mussà ch'ina finanziaziun da questas lavurs da sanaziun da ruinas da chastels cun daners da la FS da la lottaria naziunala è efficazia e cunvegnenta. Ultra da quai è anc adina avant maun il grond basegn da sanar ruinas.
La regenza ha perquai decidì da cuntinuar cun il project. Per las contribuziuns en il rom dal nov project ordinari "salvament da ruinas en il chantun Grischun" metta ella a disposiziun in credit general dad 1,75 milliuns francs da meds da la FS da la lottaria naziunala. Ils pajaments annuals vegnan limitads a maximalmain 350 000 francs, resalvond l'approvaziun dal credit dal cussegl grond. Ils credits per ils singuls objects vegnan deliberads dal departament d'educaziun, cultura e protecziun da l'ambient che garantescha las contribuziuns cun disposiziuns individualas sin basa d'in project concret e da la dumonda da contribuziun correspundenta.

- -
Ramosch, ruina Tschanüff; Seglias, tur Campell

Ina nova basa tecnica forestala per Trin e Flem
La regenza ha approvà la revisiun parziala da la planisaziun locala concludida da la vischnanca da Trin ils 24 d'october 2017. Cun quai ha ella dà glisch verda per construir ina nova basa tecnica forestala al lieu da la basa tecnica existenta da la vischnanca da Trin a "Porclis". Igl è necessari da construir ina nova basa tecnica forestala, suenter ch'ils dus manaschis forestals da las vischnancas da Flem e da Trin èn vegnids fusiunads en il rom d'ina reorganisaziun. Ensemen cultiveschan els ina surfatscha da guaud da circa 2588 hectaras.

-
©Uffizi federal da topografia

Contribuziun chantunala supplementara per la via da guaud a Claustra
La regenza ha approvà il project posteriur "Via da guaud Grosswald" da la vischnanca da Claustra-Serneus ed ha concedì per quai ina contribuziun chantunala da var 370 000 francs. Gia l'onn 2016 aveva la regenza mess a disposiziun var 1 milliun francs per quest project per render accessibel il guaud da protecziun en moda suffizienta per al tgirar. Il territori dal "Grosswald" cumpiglia circa 102 hectaras da guaud da protecziun che protegia il vitg da Claustra, la via chantunala, vias communalas e la lingia da la Viafier retica cunter lavinas, cunter crudada da crappa, cunter sbuvadas e cunter bovas.
En il fratemp èn gia vegnids construids 1030 meters da la via da guaud che ha ina lunghezza totala da 1280 meters. Ils ultims 250 meters ston però anc vegnir construids. Pervia dals custs resultads e pervia dals custs probabels da las lavurs che ston anc vegnir fatgas, na basta il credit concedì fin ussa betg per terminar il project tenor plan. Il motiv per quai è d'ina vart il stadi da la punt sur il Talbach ch'è stà pli nausch che supponì. Da l'autra vart han las relaziuns localas pretendì mesiras da construcziun supplementaras che n'èn betg stadas planisadas. Sch'i vegniss renunzià da renovar l'ultim traject, avess quai per consequenza ch'il punct final ch'è impurtant per la racolta da la laina e favuraivel ord vista topografica, na vegniss betg cuntanschì e ch'ina gronda part dals guauds da protecziun na fiss uschia gnanc accessibla.


Gremi: regenza
Funtauna: rg chanzlia chantunala dal Grischun
Neuer Artikel