Navigation

Inhaltsbereich

Mustgins asiatics en il Grischun – Resultats dal monitoring 2017

  • Erste Mitteilung
  • Neuen Beitrag einfügen
Dapi l'onn 2016 fa l'uffizi per la natira e l'ambient – en collavuraziun cun tschertas vischnancas – in monitoring davart ils mustgins asiatics. Cun traplas d'ovs vegnan registrads per exempel mustgins-tigher u mustgins da chaglia. Ils resultats da l'onn passà mussan ch'ils mustgins asiatics han cuntinuà a sa derasar en il Grischun.

Il monitoring 2017 ha cumpiglià las vals dal sid dal Grischun, vul dir la part sut dal Mesauc, la part sut da la Bregaglia e la vischnanca da Brusio, sco er singulas plazzas da pussar per lung da l'autostrada A13 e singulas emprovas da controlla en il territori da Cuira e da Landquart. Ils resultats mussan: En las trais vischnancas al sid dal Mesauc è il dumber da mustgins-tigher creschì envers l'onn 2016. En las vischnancas da Bregaglia e da Brusio ch'èn vegnidas resguardadas per l'emprima giada sco er al nord dal San Bernardin n'èn percunter vegnids registrads nagins mustgins-tigher che transmettan potenzialmain malsognas.

Mustgin-tigher en la part sut dal Mesauc
Quasi mintga segunda trapla ch'è vegnida messa en las vischnancas da San Vittore, da Roveredo e da Grono ha mussà in u plirs resultats positivs areguard il mustgin-tigher asiatic. I sto vegnir partì dal fatg ch'il mustgin-tigher è s'etablì potenzialmain en tscherts territoris da questas trais vischnancas. En il vitg da Monticello (vischnanca da San Vittore) è il mustgin-tigher s'etablì definitivamain. Las traplas en las vischnancas da Cama, da Bregaglia e da Brusio ch'èn situadas in zic pli aut, sco er las traplas al nord dal San Bernardin han mussà in resultat negativ areguard il mustgin-tigher asiatic.

Mustgin da chaglia er al nord da las Alps
Auter sa preschenta la situaziun concernent il mustgin da chaglia asiatic. Quel è vegnì chattà almain ina giada en tut las vischnancas registradas. I sto vegnir fatg quint ch'il mustgin da chaglia è s'etablì potenzialmain en tscherts lieus da la part sut dal Mesauc e d'auters territoris, er al nord da las Alps. Tenor la classificaziun da la confederaziun vegn il mustgin da chaglia però considerà sco vectur plitgunsch irrelevant per transmetter malsognas.

Ulteriur proceder
Dapi il cumenzament da matg 2018 vegn il monitoring cuntinuà en la medema dimensiun. Las vischnancas pertutgadas vegnan supplitgadas d'infurmar la populaziun davart mesiras preventivas, sco per exempel da sientar regularmain pitschnas accumulaziuns d'aua stagnanta (vasas da flurs, sutvaschs, recipients da ruments e.u.v.) che pon servir sco gnieus per ils mustgins. En las vischnancas, nua ch'ils mustgins-tigher èn s'etablids potenzialmain, èn previsas – sin basa da las datas actualas registradas – mesiras per cumbatter activamain cunter ils gnieus.


Agiuntas:
- rapport da stagiun 2017, monitoring davart ils mustgins asiatics da l'uffizi per la natira e l'ambient
- fegl d'infurmaziun davart il mustgin-tigher


Infurmaziuns:
Marco Lanfranchi, collavuratur scientific, uffizi per la natira e l'ambient, tel. 081 257 29 42, e-mail Marco.Lanfranchi@anu.gr.ch


Gremi: uffizi per la natira e l'ambient
Funtauna: rg uffizi per la natira e l'ambient
Neuer Artikel

Video dal monitoring dal mustgin-tigher 2016