La regenza ha nominà las represchentanzas dal chantun sco er las collavuraturas ed ils collavuraturs en uffizi accessoric dal chantun per la perioda dal 1. da fanadur 2018 fin ils 30 da zercladur 2022

Las represchentanzas dal chantun èn persunas che vegnan delegadas dal chantun respectivamain che fan uffizialmain part dals organs directivs strategics da participaziuns, d'uniuns e da fundaziuns u da societads da la facultad finanziala dal chantun. Las collavuraturas ed ils collavuraturs en uffizi accessoric dal chantun èn persunas che adempleschan incumbensas administrativas, ma ch'èn activas ordaifer l'organisaziun administrativa pli stretga. Las cumissiuns ed ils gremis, dals quals las collavuraturas ed ils collavuraturs en uffizi accessoric fan part, èn attribuids administrativamain ad in dals tschintg departaments u a la chanzlia chantunala. Tut en tut ha la regenza nominà 22 cumissiuns e gremis. 33 collavuraturas e collavuraturs en uffizi accessoric èn vegnids elegids da nov. Da quels ha la regenza nominà 11 sin basa da propostas electoralas per part liantas d'organisaziuns ordaifer l'administraziun e las 22 vacanzas restantas ha ella occupà cun 10 dunnas e cun 12 umens. La quota da dunnas en las 22 cumissiuns e gremis cun tut en tut 224 collavuraturas e collavuraturs en uffizi accessoric, importa en media 26,3 pertschient. Quai correspunda ad in augment da 2,3 pertschient envers las ultimas elecziuns avant 4 onns.

Ina survista da las represchentaziuns chantunalas e da las cumissiuns / collavuraturas e collavuraturs en uffizi accessoric è da nov sin la pagina d'internet dal chantun sut (www.gr.ch > Rumantsch > Instituziuns > Administraziun).


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 23 01, e-mail Barbara.Janom@dfg.gr.ch


Gremi: regenza
Funtauna: rg chanzlia chantunala dal Grischun