Navigaziun principala

Cuntegn da la pagina

Cusseglier guvernativ Christian Rathgeb terminescha sia tura d'ospitals

  • Erste Mitteilung
  • Neuen Beitrag einfügen
Dapi il cumenzament da l'onn ha cusseglier guvernativ Christian Rathgeb fatg visitas da lavur en ils ospitals regiunals dal Grischun. Las visitas che han lieu mintga dus onns, permettan da survegnir ina invista da la situaziun actuala dals ospitals. Cun las persunas responsablas èn vegnids discutads temas actuals dal sectur da sanadad en il chantun Grischun.

Cun la visita en l'ospital regiunal da l'Engiadin'ota ha cusseglier guvernativ Christian Rathgeb terminà dacurt sias visitas en ils ospitals regiunals dal Grischun. Il barat cun las persunas responsablas dals ospitals regiunals ha mussà ina giada dapli l'impurtanza dal provediment decentral da la sanadad en il chantun Grischun. Ils ospitals regiunals garanteschan ch'il provediment necessari da la populaziun cun ospitals saja organisà da tut temp en la topografia dal Grischun. Quant impurtant ch'in barat regular è – er ordaifer las visitas dals ospitals – han confermà ils temas discutads.

La tschertga da persunal en las regiuns daventa adina pli difficila

Il provediment decentral da la sanadad e pia quel da la populaziun en il chantun vegn confruntà cun grondas sfidas. Las visitas han mussà ch'igl è pli e pli difficil en tscherts lieus da chattar las medias ed ils medis sco er las collavuraturas ed ils collavuraturs da tgira per garantir il provediment medicinal. En spezial pervia da la spezialisaziun cuntinuanta en la scolaziun èsi difficil da chattar medias e medis cun la vasta savida fundada ch'è necessaria per la lavur en las regiuns. Sustegnids vegnan ils ospitals regiunals ed ils centers da sanadad da la populaziun. Las abitantas ed ils abitants s'engaschan nua che quai è pussaivel en il manaschi.

Il dumber minimal da cas periclitescha il provediment medicinal en il Grischun
Er prescripziuns unitaras centralisticas sin plaun naziunal pericliteschan il provediment regiunal da la sanadad. Per exempel vegn spetgada dapi in tschert temp la consultaziun da la confederaziun davart l'introducziun da dumbers minimals da cas en il provediment da basa. Cuntanscher dumbers minimals da cas duai esser en l'avegnir la premissa per la concessiun d'incaricas da prestaziun als ospitals. I sto vegnir partì dal fatg che quests dumbers minimals na vegnan betg a sa referir al dumber necessari il pli pitschen da tractaments medicinals u d'intervenziuns en ils ospitals regiunals, mabain als basegns da regiuns populadas fermamain. Sch'i vegnissan per exempel introducids dumbers minimals da cas per naschientschas, na pudessan quellas correspundentamain betg pli avair lieu en la gronda part dals ospitals regiunals dal chantun Grischun. La finala fiss il provediment medicinal da basa e da cas d'urgenza da la populaziun dal chantun Grischun bain periclità seriusamain, sche la confederaziun prescrivess in dumber minimal unitar da cas per tractaments medicinals.

Ils temas actuals mussan, quant impurtant ch'igl è d'installar en las regiuns centers da sanadad per il provediment medicinal da la populaziun, sco quai ch'il model directiv dal chantun prevesa dapi l'onn 2013.


Infurmaziuns:
cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel