Navigation

Inhaltsbereich

La populaziun grischuna è creschida mo per pauc l'onn 2017

  • Erste Mitteilung
  • Neuen Beitrag einfügen

Ils 31 da december 2017 vivevan en il chantun Grischun permanentamain 197 888 abitantas ed abitants, 338 dapli che l'onn precedent. La populaziun è creschida sut la media l'onn 2017.

Augment da la populaziun il pli debel dapi 11 onns
Cun 0,2 pertschient è la rata da creschientscha da la populaziun grischuna da l'onn passà stada cleramain pli bassa ch'ils onns precedents. L'augment per mo 338 persunas è l'augment il pli bass dapi l'onn 2006.

La tendenza envers ina creschientscha pli plauna sa mussa er sin plaun naziunal, la populaziun permanenta en Svizra (+ 0,8 pertschient) è medemamain creschida l'onn passà cleramain main ferm ch'ils onns precedents. Ils augments ils pli gronds per l'onn 2017 èn vegnids registrads en ils dus chantuns Zug e Genevra, entant ch'il Tessin e Neuchâtel han schizunt subì ina leva reducziun da la populaziun.

Concentraziun cuntinuanta sin las axas centralas
Entaifer il Grischun han las regiuns Plaun e Viamala cun mintgamai 1,6 pertschient pudì registrar l'augment da la populaziun cleramain il pli grond. Er creschida è la populaziun da las regiuns Landquart, Moesa e Plessur, entant che la populaziun da las ulteriuras sis regiuns è sa reducida levamain.

-

Abitantas ed abitants da las regiuns en il Grischun: midadas procentualas da l'onn 2017 e dumber per ils 31 da december 2017
Funtauna: uffizi federal da statistica (STATPOP)

La citad da Cuira ha quintà la fin da l'onn 2017 35 038 abitantas ed abitants permanents, 158 dapli che avant in onn. Da las 14 vischnancas grischunas cun passa 3000 abitantas ed abitants èn Tusaun e Panaduz creschidas il pli fitg. Las grondas vischnancas turisticas da Tavau, da San Murezzan e d'Arosa han percunter pers abitantas ed abitants.

En media dumbrava ina vischnanca grischuna la fin da l'onn passà 1767 abitantas ed abitants. Otg vischnancas avevan main che 100 abitantas ed abitants, Lon era la pli pitschna cun 42 abitantas ed abitants.

Main naschientschas e dumber regressiv d'immigraziuns
L'onn 2017 èn naschids en il Grischun 1712 uffants, quai èn 94 main che l'onn precedent. Damai ch'il dumber da mortoris ha cuntanschì a medem temp in nivel uschè aut sco anc mai cun 1746, ha il Grischun registrà – sco in da mo quatter chantuns – in saldo da naschientschas negativ (naschientschas minus mortoris).

La responsabladad principala per la creschientscha modesta da la populaziun è però er en il Grischun la diminuziun da l'immigraziun. Il saldo da migraziun internaziunal (immigraziun da minus emigraziun en l'exteriur) che decida – pervia da sia autezza – considerablamain davart il svilup demografic, era l'onn 2017 tar mo 1055 persunas. Entant ch'il saldo interchantunal era cun minus 637 persunas en il sectur dals onns precedents. Vinavant van pia bler dapli persunas davent dal Grischun a sa domiciliar en auters chantuns che viceversa.

-
Cumponentas dal svilup da la populaziun en il chantun Grischun, 2008–2017 (valurs absolutas)
Funtauna: uffizi federal da statistica (STATPOP/BEVNAT)

Stgars 37 000 burgais esters
Il Grischun dumbrava la fin da l'onn 2017 36 903 abitantas ed abitants permanents cun dretg da burgais exclusivamain ester, 285 dapli che la fin dal 2016. La gruppa la pli gronda preschentan anc adina ils Portugais cun 9333 persunas, suandads da las persunas da naziunalitad tudestga (7434) e taliana (6584). 444 persunas èn vegnidas natiralisadas l'onn passà, 86 main che durant l'onn precedent.

Ils detagls davart ils dumbers da la populaziun e davart ils svilups demografics da tut las vischnancas e da tut las regiuns sco er ulteriuras infurmaziuns stattan a disposiziun sin la pagina d'internet da l'uffizi per economia e turissem (guardar Statistik und Register).


Infurmaziuns:
Patrick Casanova, manader da la partiziun "statistica e registers", tel. 081 257 23 74, e-mail Patrick.Casanova@awt.gr.ch


Gremi: uffizi per economia e turissem
Funtauna: rg uffizi per economia e turissem

Neuer Artikel