La regenza ha prendì posiziun tar il project d'ina nova lescha federala davart las medias electronicas. Ultra da quai ha ella approvà dus projects da via per meglierar la via dal Lucmagn e la via d'Engiadina.
La purschida da basa rumantscha sto restar
La regenza ha prendì posiziun tar in project da consultaziun dal departament federal per ambient, traffic, energia e communicaziun (DATEC) che prevesa ina nova lescha federala davart las medias electronicas. La nova lescha vul che – sper radio e televisiun – er las medias online contribueschian en il futur al servetsch public medial e possian vegnir promovidas. Ultra da quai duai la nova lesch remplazzar la lescha federala existenta davart radio e televisiun (LRTV).
La regenza constatescha che la digitalisaziun cuntinuanta haja chaschunà ina midada da las purschidas e da l'utilisaziun da medias e che la necessitad d'ina nova lescha saja dada senza dubi. Perquai beneventa ella in nov urden che resguarda er purschidas da medias betg linearas. Ord vista da la politica da linguas saja quai d'ina impurtanza centrala per il chantun Grischun che las linguas minoritaras naziunalas rumantsch e talian vegnian resguardadas en quest connex. En moda positiva giuditgescha la regenza perquai il fatg ch'il project dat a la minoritad linguistica taliana il medem status sco a las duas grondas gruppas linguisticas naziunalas tudestg e franzos, essend che la SRG SSR duai furnir ina purschida publicistica equivalenta en tudestg, franzos e talian.
Las novas cundiziuns generalas per il rumantsch resguarda la regenza percunter sco discriminantas, perquai che rumantsch duai vegnir resguardà mo pli "en moda commensurada". Perquai pretenda ella ch'i stoppia vegnir fixada en la nova lescha federala davart las medias electronicas– sco en la LRTV vertenta – ina purschida publicistica concreta a favur da la regiun linguistica rumantscha. Latiers tutga ina purschida da basa tant en il sectur dal radio sco er en il sectur da la televisiun che tegna quint da la quarta lingua naziunala.
Plinavant s'engascha la regenza ch'il pajament vertent da daners da promoziun a la diffusiun da programs da radio ed il sustegn da novas tecnologias da diffusiun a favur da las regiuns muntagnardas vegnia mantegnì. Plinavant èsi impurtant per il chantun Grischun ch'il model actual da consegna vegnia cumplettà e rinforzà en vista al dumber per part fitg pitschen da gasettas localas e regiunalas abunadas. En connex cun la reducziun da las tariffas da consegna è en quest connex l'aboliziun da la limitaziun d'ediziun ina mesira efficazia.
Documents da consultaziun DATEC
La via dal Lucmagn vegn schlargiada
La regenza ha approvà il project d'exposiziun per la correcziun da la via dal Lucmagn tranter Las Ruinas e la punt da Medel cun permissiuns spezialas e cun cundiziuns. La via actuala è vegnida construida ils onns 1956 fin 1964 en il rom da la construcziun da las ovras electricas. Ella na correspunda oz dentant betg pli a las pretensiuns areguard il standard d'ina via principala. Uschia è la via memia stretga en il perimeter dal project, cun la consequenza che camiuns na pon per gronda part betg cruschar in l'auter. Cun la correcziun da la via planisada èsi previs da schlargiar la via a 6 meters, d'auzar il tunnel a 4,2 meters e da construir zonas da portal e dus locals da refugi per il salvament. Cun in trassé optimà vegn la segirezza augmentada supplementarmain sin quest traject.
En il sectur dal cumenzament dal project, sin ina lunghezza da circa 180 meters, vegn il tunnel existent Las Ruinas schlargià da tuttas duas varts. Lura cumenza il nov tunnel Las Ruinas cun ina lunghezza da circa 320 meters. Quel guntgescha las gallarias ed ils tunnels existents Val Zagrendra 1 e 2 da la vart da la muntogna. Da schlargiar ils tunnels e las gallarias existentas en quest sectur, entant ch'il traffic circulescha vinavant, duvrass bler temp e chaschunass gronds custs, perquai che la via dal Lucmagn sa chatta datiers da la surfatscha dal grip. Entant che las gallarias Val Zagrendra 1 e 2 vegnan renatiralisadas, vegn la part che na vegn betg pli duvrada dal tunnel Val Zagrendra separada cun paraids e cun ina porta da giatter. Il tunnel Val da Rein, che ha ina lunghezza da 97 meters e che sa chatta a la fin dal project vegn puspè schlargià. Las lavurs vegnan da princip exequidas, entant ch'il traffic circulescha vinavant. Durant quest temp stoi esser garantì ch'il traffic vegnia manà almain sin in vial e reglà cun amplas da traffic. Ils custs totals da quest project importan circa 31,5 milliuns francs.
Nov access a la zona da mastergn Plan da Muglin
La regenza ha approvà in project d'exposiziun cun permissiuns spezialas e cun cundiziuns per renovar e per engrondir in traject da la via d'Engiadina. La substanza architectonica dal traject da via tranter Tschern e Punt Pedra deriva da la mesadad dal 20. tschientaner ed ha patì fermamain dal grond augment da traffic ils ultims 20 onns. Cun il project qua avant maun vegn la via d'Engiadina schlargiada ad ina ladezza d'almain 7 meters e la surstructura ed il sistem da l'allontanament da l'aua vegnan er renovads.
Ultra da quai n'ha l'access actual a la zona da mastergn Plan da Muglin (vischnanca da Valsot) avant la Punt Pedra nagin vial per sviar a sanestra e la geometria da la via na correspunda betg a las normas ed a las directivas actualas. Per quest motiv prevesa la vischnanca da realisar in nov access a la zona da mastergn Plan da Muglin e da colliar quel cun la via principala H27. Pia è planisà en quest sectur da la H27 in schlargiament da la via per far plazza per in vial per sviar a sanestra. Ils custs totals da quest project importan circa 5,4 milliuns francs.
Iniziativa dal pievel per reducir il cussegl grond è reussida
La regenza ha constatà che l'iniziativa dal pievel "Per la reducziun dal cussegl grond – 90 bastan" è reussida cun 4359 suttascripziuns valaivlas. Il dumber minimal da 4000 suttascripziuns che vegn prescrit da la lescha è pia vegnì surpassà. L'iniziativa constituziunala è vegnida redigida en furma d'ina proposta generala. Cun l'inoltraziun da las glistas da suttascripziun ils 12 da settember 2018 è er vegnì observà il termin dad 1 onn per rimnar suttascripziuns. Resguardond ils termins legals vegn l'iniziativa surdada a la chanzlia chantunala per l'ulteriura elavuraziun en il rom dals conclus da princip da la regenza.
Gremi: regenza
Funtauna: rg chanzlia chantunala dal Grischun