La regenza ha concedì ina contribuziun chantunala a favur d'ina nova via da velos tranter Cuira e Trimmis ed ha fixà las contribuziuns per il traffic public 2019.
La regenza ha approvà ina nova via da velos tranter Cuira e Trimmis
La regenza ha approvà – cun permissiuns e cundiziuns spezialas – in project per construir ina nova via da velos tranter Cuira e Trimmis. Il chantun sa participescha cun ina contribuziun da maximalmain 972 000 francs. Malgrà la distanza attractiva per velos tranter las duas vischnancas profita actualmain mo ina pitschna part da la populaziun da la via da velos per occupaziuns quotidanas intercommunalas. Las colliaziuns existentas vegnan evitadas en il mintgadi, pervia da grondas muntadas u pervia d'ina concepziun insuffizienta dal vial. La nova via da velos duai exaurir il grond potenzial da questa colliaziun da velos per il mintgadi e distgargiar il traffic public sco er il traffic d'autos. La via da velos cumenza tar la via Cadonau a l'ur il pli al nord da la citad da Cuira. Suenter in nov trassé che traversa la prada vegn duvrada ina via da guaud existenta che maina fin a la Maschänserrüfe. Silsuenter percurra la via da velos sur la via centrala da Trimmis. Sco part da l'inventari federal da las vias da communicaziun istoricas da la Svizra (IVS) giauda questa via ina protecziun speziala. La regenza ha disponì perquai – en cunvegnientscha cun ils posts federals cumpetents – che las structuras existentas ed il trassé da la via centrala restian tals e quals. Ina cuvrida d'asfalt u in'autra cuvrida dira è inadmissibla sin quest traject da la via. Sin ils ulteriurs trajects garantescha ina cuvrida d'in asfalt spezial che la via da velos saja persistenta e possia vegnir duvrada en il mintgadi independentamain da l'aura e da la stagiun. En il guaud na vegn la cuvrida a media vista strusch distinguida da quella d'ina via da guaud, grazia a sia cuvrida da gera cun in tractament da la surfatscha spezial.
©Uffizi federal da topografia
Fixà las contribuziuns per il traffic public 2019
Per l'onn d'urari 2019 importan ils custs totals betg cuvrids per il traffic public en il chantun Grischun previsiblamain var 140,9 milliuns francs; da quels surpiglia la confederaziun tut en tut ina part da var 102,8 milliuns francs u 73 pertschient dals custs totals.
Dals 140,9 milliuns francs betg cuvrids èn 134,7 milliuns francs d'attribuir a la sparta traffic da persunas e 6,2 milliuns francs a la sparta traffic da rauba. En questas cifras è cuntegnida la quota chantunala 2019 da 123 354 674 francs, che la confederaziun ha fixà per il Grischun per il traffic regiunal da persunas (TRP). Vi da quest import sto il chantun pajar ina quota da 20 pertschient, quai che correspunda ad ina contribuziun da 24,7 milliuns francs. Il chantun ha empustà ultra da quai (per part er sco mesira per promover il traffic public) prestaziuns supplementaras en il traffic da persunas (inclusiv consorzis tariffars) en la dimensiun dad 11,3 milliuns francs che na vegnan betg cofinanziads da la confederaziun. Ensemen cun ils 2,0 milliuns francs per il manaschi dal traffic da rauba che sto vegnir finanzià ensemen cun la confederaziun, resulta pia ina contribuziun chantunala da totalmain 38,1 milliuns francs per l'onn 2019.
La cunvegna d'empustaziun cun la AutoDaPosta Svizra SA è vegnida fatga mo provisoricamain. Sin fundament dal rapport d'examinaziun da la partiziun da revisiun da l'uffizi federal da traffic èsi da partir dal fatg, che la AutoDaPosta Svizra SA demussia er en las offertas per l'onn d'urari 2019 custs betg cuvrids memia auts. Uschespert ch'il basegn d'indemnisaziun effectiv è enconuschent, vegn restituida proporziunalmain ina eventuala differenza a las empustadras ed als empustaders.
Gremi: regenza
Funtauna: rg chanzlia chantunala dal Grischun