Navigation

Inhaltsbereich

La praschun – ina partenaria per la mastergnanza grischuna

  • Erste Mitteilung
  • Neuen Beitrag einfügen
L'uffizi per l'execuziun giudiziala dal Grischun tschertga actualmain interpresas, mastergns e posts da servetsch grischuns che vulessan producir en las localitads da mastergn da la nova praschun serrada Cazas Tignez. In nov video da la chanzlia chantunala mussa ils avantatgs d'ina collavuraziun cun la praschun.

Actualmain vegn construida la nova praschun Cazas Tignez en proxima vischinanza dal stabiliment giudizial avert Realta. Il mument che la praschun vegn averta po ella occupar fin 152 praschuniers en sias localitads da mastergn. Questas novas localitads èn impurtantas, perquai ch'ils praschuniers èn obligads tenor lescha da lavurar. Circa la mesadad da las persunas collocadas realiseschan products e servetschs per il martgà extern. Ellas exequeschan lavurs d'emballadi e da confecziun, liquideschan lavurs da scrinari, da montascha e da recicladi – ed ellas pon er surpigliar incumbensas d'auters secturs.

Occurrenzas d'infurmaziun per las parts interessadas
Las parts interessadas da l'industria e da la mastergnanza èn vegnidas infurmadas da l'uffizi per l'execuziun giudiziala a chaschun d'occurrenzas a Cazas davart las diversas pussaivladads d'utilisaziun da l'infrastructura industriala da la praschun Cazas Tignez. Il cusseglier guvernativ Christian Rathgeb, schef dal departament da giustia, segirezza e sanadad, e la direcziun da l'uffizi per l'execuziun giudiziala, timunà dal manader da l'uffizi Matthias Fässler, han mussà l'impurtanza da la lavur dals praschuniers ed han orientà davart las pussaivladads da producziun en ils novs lavuratoris.

La lavur dals praschuniers ademplescha bleras incumbensas

En l'execuziun da chastis sto la lavur ademplir bleras funcziuns. Emprender ed exercitar sin ils champs professiunals e pedagogics gidan a rinforzar la fidanza en las atgnas abilitads dals praschuniers e gidan ad activar lur potenzial individual. Las abilitads che vegnan promovidas uschia permettan da meglierar las schanzas d'ina vita senza chastis suenter la relaschada. Ina incumbensa da producziun per la praschun Cazas Tignez gida ultra da quai a reducir ils custs da la detenziun.

Ils manaschis industrials da la praschun sa chapeschan sco partenaris

Las pretensiuns economicas da la praschun Cazas Tignez s'orienteschan – sco en ils manaschis da l'economia privata – als basegns dal martgà. Ils pretschs per ils products e per ils servetschs sa drizzan tenor ils products e tenor ils servetschs cumparegliabels da l'economia libra. Ils manaschis industrials da la praschun Cazas Tignez sa chapeschan sco partenaris e betg sco concurrenza da l'economia indigena ed èn pia zunt interessads per eventualas cooperaziuns. Quai cuntegna er la pussaivladad da pudair producir e fabritgar en pitschnas quantitads. Ils locals multifuncziunals da las duas hallas d'industria, da la scrinaria e da l'atelier stattan pia a disposiziun per ils basegns da producziun individuals da l'economia grischuna.

Dapli infurmaziuns davart la praschun Cazas Tignez chattais Vus sin la pagina d'internet da l'uffizi per l'execuziun giudiziala www.ajv.gr.ch.


Fotografia:
-
Las duas hallas d'industria (mellen/blau), la scrinaria (cotschen) e l'atelier (rosa) da la nova praschun Cazas Tignez èn actualmain anc en construcziun


Infurmaziuns:
- cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
- Mathias Fässler, manader da l'uffizi per l'execuziun giudiziala, tel. 081 257 52 51, e-mail Mathias.Fässler@ajv.gr.ch


Gremi: departament da giustia, segirezza e sanadad
Funtauna: rg uffizi per l'execuziun giudiziala
Neuer Artikel

Lavur dals praschuniers en la nova praschun Cazas Tignez