La regenza ha approvà dus projects da sanaziun cunter la canera da via a Giuvaulta ed a Favugn. Ultra da quai ha ella concedì contribuziuns or dal fond da sport per federaziuns e per organisaziuns grischunas da sport.

Approvà projects da sanaziun cunter la canera a Giuvaulta ed a Favugn
La regenza ha approvà dus projects da sanaziun cunter la canera a Giuvaulta ed a Favugn. Per tuts dus projects èn vegnidas examinadas mesiras per reducir la canera, e quai a maun d'in scenari da la grevezza da canera per l'onn 2035. Il scenari fa quint cun in augment dal traffic da 25 pertschient e cun in augment correspundent da la canera dad 1 decibel.
Il project da sanaziun a Giuvaulta cumpiglia d'ina vart in traject da la via da Tumleastga tranter la punt da Valragn e la val da Tumegl, da l'autra vart la via da Giuvaulta a l'entrada dal vitg. L'augment prognostitgà da la canera chaschuna in surpassament da la limita d'immissiuns per in edifizi a la via da Tumleastga. Ils edifizis a la via da Giuvaulta n'èn betg pertutgads d'in surpassament. Sin la via da Giuvaulta po la valur d'immissiuns vegnir reducida vinavant cun ina nova cuvrida da standard da la via. La cuvrida actuala sto tuttina vegnir remplazzada il pli tard en 5 onns, uschia ch'i na resultan nagins custs supplementars. Las premissas per realisar mesiras da sanaziun architectonicas e funcziunalas sin la via da Tumleastga n'èn percunter betg ademplidas. La regenza conceda perquai facilitaziuns da l'obligaziun da sanaziun per l'object pertutgà.
Il project a Favugn cumpiglia d'ina vart il traject da la via da Favugn (via chantunala) tranter la via da la staziun ed il Flidaweg, da l'autra vart la Burgstrasse e la Untergasse (vias communalas). En il stadi da giudicament per l'onn 2035 datti quatter surpassaments da la limita d'immissiuns per lung dals trajects da via examinads. Per ils edifizis d'abitar, da biro u da mastergn pertutgads na sa mussan però naginas da las mesiras da sanaziun funcziunalas u architectonicas examinadas sco adattadas. Perquai conceda la regenza facilitaziuns da l'obligaziun da sanaziun er per quests objects.

 

projects da sanaziun cunter la canera a Giuvaulta (a sanestra) ed a Favugn 
© Uffizi federal da topografia

Contribuziuns or dal fond da sport
La regenza ha garantì contribuziuns pauschalas or dal fond da sport a las commembras ed als commembers da la federaziun da tetg dal sport grischun. Cun quellas duai vegnir promovida la lavur generala da federaziun e d'uniun. A tut en tut 43 federaziuns ed organisaziuns da sport vegn concedida ina summa totala dad 1 milliun francs.
Da questas contribuziuns or dal fond da sport profitan tut en tut 618 uniuns. Il pli grond dumber d'uniuns commembras dumbra la federaziun grischuna dal sport da tir cun 120 uniuns. La federaziun da sport cun il pli grond dumber da commembras e commembers è la secziun grischuna dal Club alpin svizzer cun tut en tut 12 099 commembras e commembers, suandada da la federaziun da skis dal Grischun cun 11 534 commembras e commembers. L'Associaziun grischuna da gimnastica ha la pli gronda partiziun da juniors, numnadamain 4548 uffants e giuvenils.


Gremi: regenza
Funtauna: rg chanzlia chantunala dal Grischun