La revisiun parziala da la lescha da polizia ch'è vegnida concludida en la sessiun d'avust 2018 entra en vigur il 1. da schaner 2019 ensemen cun las ordinaziuns executivas respectivas.

La revisiun parziala da la lescha da polizia chaschuna ina revisiun parziala da l'ordinaziun da polizia, la creaziun d'ina ordinaziun davart la surveglianza visuala dal spazi public e dal spazi ch'è accessibel al public sco er ina revisiun totala da las tariffas per calcular ils custs da las prestaziuns da la polizia chantunala.

Revisiun parziala da l'ordinaziun da polizia
Tras la revisiun parziala da la lescha da polizia èn vegnidas stgaffidas differentas mesiras polizialas. L'autorisaziun d'ordinar e d'exequir quellas è resalvada a polizistas ed a polizists cun in tschert grad. En general sa tracti da l'uffiziera u da l'uffizier da polizia ch'è cumpetent en chaussa, en cas urgents da l'uffiziera u da l'uffizier da pichet. Ils organs communals da polizia pon fermar persunas ed exequeschan qua tras ina mesira poliziala en il senn da la lescha da polizia, na ston dentant betg ademplir pretensiuns uschè grondas. Tuttina stoi sa tractar qua almain d'ina polizista u d'in polizist cun attest da qualificaziun federal. Ultra da las disposiziuns concernent las cumpetenzas vegn reglada l'utilisaziun d'uschenumnadas bodycams. L'ordinaziun precisescha las premissas per l'utilisaziun e prescriva la perceptibladad. Las registraziuns vegnan stizzadas automaticamain suenter 30 dis. Questas regulaziuns vegnan cumplettadas tras singulas disposiziuns executivas tar las mesiras da la nova lescha da polizia e tras l'adattaziun da disposiziuns davart la protecziun da datas.

Nova ordinaziun davart la surveglianza visuala dal spazi public e dal spazi ch'è accessibel al public
Cun l'entrada en vigur da la revisiun da la lescha da polizia vegn la surveglianza visuala e sonora che sa referescha a persunas reglada per part en la lescha da polizia e per part en la lescha chantunala davart la protecziun da datas. Questa divisiun en duas parts ha er in effect sin il stgalim da l'ordinaziun. En l'ordinaziun da polizia vegnan precisadas las furmas da la surveglianza visuala e sonora che sa referescha a persunas, ch'èn regladas en la lescha da polizia. Là na vegnan percunter betg francadas las disposiziuns executivas che sa refereschan a la surveglianza visuala da persunas en il spazi public ed en il spazi ch'è accessibel al public. Talas tutgan en in'ordinaziun executiva tar la lescha chantunala davart la protecziun da datas. Perquai ch'ina tala n'exista betg anc, sto vegnir stgaffida ina nova ordinaziun per quest intent. Plinavant vegnan designadas las autoritads ch'èn cumpetentas e responsablas per la surveglianza visuala sin plaun chantunal. Dentant betg sin plaun communal, perquai ch'i vegniss uschiglio fatg intervenziuns en l'autonomia da las vischnancas.

Revisiun totala da las tariffas per calcular ils custs da las prestaziuns da la polizia chantunala
Tenor la revisiun da la lescha da polizia po la polizia chantunala ademplir ina incumbensa da la polizia da segirezza empè d'ina vischnanca, sche la vischnanca n'ademplescha betg quella. Tras questa uschenumnada execuziun d'uffizi resultan per la polizia chantunala custs che la vischnanca sto pajar. La procedura correspundenta sco er las tariffas d'indemnisaziun decisivas ston vegnir regladas en l'ordinaziun da taxas vertenta da la polizia chantunala. Questa midada è vegnida prendida sco motiv per examinar fundamentalmain las tariffas da taxas che vegnan incassadas actualmain. La regenza è vegnida a la conclusiun che la regulaziun detagliada existenta dals causals da taxas è sa cumprovada e ch'ella duai perquai vegnir mantegnida. Da nov vegn introducida ina part generala che normescha la moda da calcular las taxas, il relasch da taxas e la cumpetenza sco er la procedura d'incassar taxas. La concepziun da las taxas duai daventar pli transparenta e la procedura d'incassar taxas duai vegnir reglada en moda pli clera. La finala vegnan ils causals da taxas, sche pussaivel, simplifitgads e resumads, e l'ordinaziun survegn in nov num.


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: regenza
Funtauna: rg departament da giustia, segirezza e sanadad