Zum Seiteninhalt

Concurrenza da projects per la reconstrucziun da Bondo

Il "project per ovras da protecziun Bondo" cuntegna la reconstrucziun e la protecziun dals vitgs da Bondo, Sottoponte e Spino. Per quest intent ha la vischnanca da Bregaglia publitgà ina concurrenza da projects per la renovaziun da differents rempars e stabiliments da traffic a Bondo. Il project vegn realisà cuminaivlamain da la vischnanca da Bregaglia e dal chantun Grischun.

I vegnan tschertgadas soluziuns che s'integreschan optimalmain en il maletg dal lieu e da la cuntrada istoric e degn da vegnir protegì. Cun questa concurrenza da projects vegn stgaffida la basa per la reconstrucziun futura da las infrastructuras necessarias.

La bova ha rubà l'identitad da Bondo
La bova dal Piz Cengalo dals 23 d'avust 2017 e las sbuvadas suandantas han chaschunà destrucziuns da gronda dimensiun en ils vitgs da Bondo, Sottoponte e Spino. Differentas vias e punts, il provediment d'aua e d'electricitad sco er plirs edifizis èn vegnids donnegiads u destruids cumplettamain. Quests eveniments han chaschunà ina gronda consternaziun tar la populaziun indigena ed ina resonanza remartgabla en Svizra. Gist suenter ils eveniments han las autoritads da la vischnanca e dal chantun instradà mesiras d'urgenza e cumenzà cun la planisaziun da la reconstrucziun. Cun quest project per ovras da protecziun duain vegnir restituids a la vischnanca in toc structura dal vitg e sia identitad.

La concurrenza da projects per la nova concepziun
L'object da la concurrenza da projects è l'elavuraziun d'ina proposta da soluziun per concepir tenor criteris da l'architectura da cuntrada ils rempars sco er differents stabiliments da traffic novs e d'als integrar concepziunalmain en la cuntrada ed en il maletg dal vitg. L'incumbensadra è la vischnanca da Bregaglia. La procedura sco er l'ulteriura planisaziun e realisaziun vegnan fatgas en stretga collavuraziun cun il chantun Grischun.

La procedura
I vegn realisada ina concurrenza da projects en la procedura selectiva. Partind da l'incumbensa vegnan tschertgads teams che cuvran ils champs correcziun dals curs d'aua, fatgs d'inschigneria da construcziun cun la construcziun da vias e da punts sco er il champ architectura da cuntradas ed urbanistica. En l'emprima fasa ha lieu la prequalificaziun, quai vul dir che la giuria designescha ils teams ils pli adattads or da las annunzias. En la segunda fasa inoltreschan ils concurrents admess lur ideas da project. Fin ils 5 d'avrigl 2019 pon s'annunziar per la qualificaziun teams ch'èn autorisads da sa participar a la concurrenza da projects. Ils teams prequalifitgads vegnan communitgads fin la fin d'avrigl 2019. Ils resultats da la segunda fasa èn previs per la fin da november 2019. Ils documents da publicaziun èn disponibels sut www.simap.ch, www.kantonsamtsblatt.gr.ch e www.comunedibregaglia.ch.
 

Infurmaziuns:
- Reto Knuchel, inschigner chantunal, uffizi da construcziun bassa dal Grischun, tel. 081 257 37 01, e-mail Reto.Knuchel@tba.gr.ch
- Anna Giacometti, presidenta communala da Bregaglia, tel. 081 822 60 70, e-mail Anna.Giacometti@bregaglia.ch


Funtauna: rg uffizi da construcziun bassa