Zum Seiteninhalt

Il chantun Grischun prenda mesiras da protecziun a favur da la selvaschina

Il chantun Grischun ha relaschà mesiras da protecziun temporaras per facilitar a la selvaschina da surviver suenter las grondas navaglias. Las finamiras vulan segirar spazis da viver senza disturbis per ils animals ed als tegnair davent da territoris abitads, da vias da traffic e da pistas da skis. Per pudair surviver dovran ils animals paus.

Pervia da las navaglias extraordinariamain grondas en il Grischun dal nord èn vegnidas instradadas diversas mesiras per quietar la selvaschina. En la Surselva, en il Partenz ed en l'Engiadina bassa èn vegnidas determinadas ulteriuras zonas da paus per la selvaschina, è vegnida relaschada l'obligaziun da tegnair ils chauns a la corda ed èn vegnidas serradas vias e sendas. Questas mesiras èn vegnidas disponidas da las vischnancas en collavuraziun cun la surveglianza da chatscha da l'uffizi da chatscha e pestga ed èn vegnidas realisadas cuminaivlamain cun las secziuns da chatschaders.

La surveglianza chantunala da chatscha ed ils organs forestals da l'uffizi da guaud e privels da la natira ensemen cun l'organisaziun per la tgira da la selvaschina da l'uniun grischuna da chatschaders da patenta (UGCP) valiteschan permanentamain la situaziun da la selvaschina en tut las regiuns dal chantun.

En las regiuns Tavau e Claustra sa trategna la selvaschina pli e pli savens en la vischinanza dals abitadis e sin las vias e sin ils binaris. Ella periclitescha uschia sasezza, dentant er terzas persunas. Sco mesiras directivas vegnan ussa terradas intginas plantas en ils refugis natirals dals animals e là stat er a disposiziun fain en cas spezials.

Malgrà las grondas quantitads da naiv è la selvaschina dal Grischun preparada generalmain bain per quest enviern. L'atun ha ella gì bler pavel ed ha pudì sa preparar bain per las fradaglias e per la stgarsa purschida da nutriment durant l'enviern, sch'ella na vegn betg disturbada da l'uman. Mesiras d'agid bain manegiadas, sco pavlar, fan dapli donn che niz als animals. Ellas carmalan ils animals ord lur spazis da viver e pon schizunt esser la causa da lur mort. Il scumond da pavlar è pia raschunaivel e vala anc adina.

Pagina d'internet cun infurmaziuns: www.stop-fuetterung.ch  


Infurmaziuns:
- dr. Adrian Arquint, schef da l'uffizi da chatscha e pestga dal Grischun, tel. 081 257 38 92, e-mail Adrian.Arquint@ajf.gr.ch
- Hannes Jenny, biolog da selvaschina, uffizi da chatscha e pestga dal Grischun, tel. 081 257 38 92, e-mail Hannes.Jenny@ajf.gr.ch


Gremi: uffizi da chatscha e pestga
Funtauna: rg uffizi da chatscha e pestga