Sin invit da la regenza ha l'ambassadur tudestg, Norbert Riedel, visità oz il chantun Grischun.

L'ambassadur da la republica federala tudestga Norbert Riedel è vegnì beneventà oz en la chasa grischa a Cuira dal president da la regenza Jon Domenic Parolini e dal chancelier Daniel Spadin. L'ambassadur è vegnì accumpagnà da la delegada diplomatica Sabine Seidler. Suenter il barat dals salids uffizials è stà in gentar cuminaivel sin il program.

La regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia:

Da sanestra: Il president da la regenza dr. Jon Domenic Parolini, l'ambassadur dr. Norbert Riedel, la delegada diplomatica Sabine Seidler ed il chancelier Daniel Spadin.


Gremi: regenza
Funtauna: rg chanzlia chantunala