Navigation

Inhaltsbereich

  • Erste Mitteilung
  • Neuen Beitrag einfügen
Il project davart la revisiun da la lescha concernent la flexibilisaziun da las finanzas (GrFlex) ha chaschunà in grond resun en il rom da la consultaziun tar las partidas politicas, tar las vischnancas e tar las organisaziuns d'interess. Sustegnidas vegnan la finamira da tegnair las finanzas chantunalas a lunga vista en equiliber e las stentas da stgaffir en moda prospectiva dapli libertad d'agir per diriger las expensas. Refusadas vegnan mesiras che pudessan engrevgiar supplementarmain las vischnancas. Ideas divergentas datti en connex cun il proceder. Il proxim pass vegn ad esser in'examinaziun cumplessiva da las incumbensas e da las prestaziuns, quai che correspunda a las pretensiuns.

Segirar libertads d'agir en dumondas da las expensas

Las totalmain 122 respostas entradas en connex cun la consultaziun mussan in grond interess per il project da GrFlex. Las posiziuns divergeschan fermamain. Savens vegni renvià a la situaziun da las finanzas e da la facultad ch'è actualmain buna ed uschia a la mancanza da necessitad dal project. En quest connex vegn il project GrFlex percepì – en spezial d'organisaziuns d'interess – sco smanatscha en quai che concerna la fidadadad da prestaziuns. Las partidas grischunas e las vischnancas beneventan per gronda part las libertads d'agir planisadas tar las expensas. Ellas crititgeschan quels elements che pudessan chaschunar directamain u indirectamain in adossament da chargias a las vischnancas. Pertutgads da quai èn ils quatter secturs furmaziun professiunala, scolas da chant e da musica, supplements da famiglia per persunas senza activitad da gudogn sco er la gulivaziun da finanzas per las vischnancas. Cun renunziar a la revisiun da las quatter leschas correspundentas poi vegnir tegnì quint da las objecziuns las pli impurtantas.

Renunzia ad ina lescha generala

Sin fundament da las posiziuns sco er sin basa d'ulteriuras evaluaziuns internas ha la regenza fixà las prioritads per garantir a lunga vista l'equiliber da las finanzas chantunalas. La tenuta principala da flexibilisar tschertas leschas vul ella mantegnair. Ella persequitescha vinavant la finamira da dar al cussegl grond libertads d'agir suffizientas per diriger las expensas en tut ils champs d'incumbensas dal chantun. Ad ina missiva al cussegl grond cun ina lescha generala da GrFlex renunzia la regenza però. La finamira da la flexibilisaziun po e duai vegnir realisada en etappas.

Examinaziun da las incumbensas e da las prestaziuns sco proxim pass

Sco proxim pass duai però vegnir prendida per mauns in'examinaziun cumplessiva da las incumbensas e da las prestaziuns sco ch'ella vegn pretendida en la consultaziun. L'ultima examinaziun detagliada da las incumbensas e da las prestaziun è vegnida fatga l'onn 2010 sa basond sin la constituziun chantunala. L'urari e la concepziun da questa examinaziun vegnan fixads anc en il decurs da l'onn 2019.

Gestiun sistematica da las finanzas sur directivas da la politica da finanzas
La gestiun da las finanzas chantunalas a media vista vegn fatga sin basa da las directivas da la politica da finanzas ch'il cussegl grond fixescha mintga quatter onns. Questas valurs directivas giaudan ina gronda acceptanza e garanteschan en la concepziun vertenta finanzas chantunalas saunas. Cun la missiva tar il program da la regenza e tar il plan da finanzas 2021-2024 fixescha il cussegl grond las novas valurs directivas il favrer 2020. En quest connex duain las valurs directivas vegnir consolidadas. Il medem mument preschenta la regenza en connex cun questa missiva l'ulteriur proceder planisà per segirar las finanzas chantunalas a lunga vista. Consequentamain duai vegnir renunzià da suttametter al conclus dal cussegl grond las valurs directivas concernent la partenza e concernent la concepziun d'in pachet da distgargia cumplessiv. La regenza sa distanziescha anc adina da preparar in pachet da spargn sin reserva.

Agiunta:
Preschentaziun


Infurmaziuns:
- cusseglier guvernativ dr. Christian Rathgeb, schef dal departament da finanzas e vischnancas, tel. 081 257 32 01, e-mail Christian.Rathgeb@dfg.gr.ch  
- Urs Brasser, secretari da finanzas dal departament da finanzas e vischnancas, tel. 081 257 32 12, e-mail Urs.Brasser@dfg.gr.ch  


Gremi: regenza
Funtauna: rg departament da finanzas e vischnancas
Neuer Artikel