Navigaziun principala

Cuntegn da la pagina

Il chantun fa cunvegnas d'enclegientscha cun interpresas da construcziun involvidas en proceduras da la CUMCO

  • Erste Mitteilung
  • Neuen Beitrag einfügen
Il chantun Grischun è sa cunvegnì cun nov interpresas da construcziun dal sectur da cuvridas da vias davart pajaments d'enclegientscha ed ha stgaffì la basa per nova confidenza en l'avegnir. Ulteriuras cunvegnas d'enclegientscha èn en elavuraziun.

Il chantun Grischun ha fatg cunvegnas d'enclegientscha cun nov interpresas da construcziun (en urden alfabetic): Cellere, Centorame, Foser, Hew, Käppeli, Mettler Prader, Schlub, Toldo e Walo Bertschinger. I sa tracta d'interpresas ch'èn tangadas da l'inquisiziun currenta da la cumissiun da concurrenza (CUMCO) concernent cunvegnas anticoncurrenzialas en il sectur da cuvridas da vias en tut il chantun (senza Moesa) durant la perioda da l'onn 2004 fin il matg 2010.

Pajament d'enclegientscha e mesiras da compliance
Las interpresas èn s'obligadas da pajar ina cumpensaziun. La calculaziun da quella sa basa particularmain sin datas da la svieuta che la CUMCO ha verifitgà e sin ulteriurs elements dals fatgs. Las vischnancas grischunas pertutgadas pon s'associar a la cunvegna d'enclegientscha negoziada dal chantun. Ils pajaments d'enclegientscha importan totalmain 5 fin 6 milliuns francs. Ultra da quai èn las interpresas s'obligadas d'introducir in program da compliance tenor il dretg da cartels. Percunter ha il chantun empermess d'admetter vinavant las interpresas a surdadas futuras d'incaricas dal chantun, sch'ellas adempleschan questas obligaziuns.

Procedura d'enclegientscha cun effect da signal
Il motiv per ils discurs d'enclegientscha èn stads l'appel dal secretariat da la CUMCO a las interpresas da construcziun dal sectur da cuvridas da vias da sa cunvegnir cun il chantun, e sia remartga ch'ina enclegientscha possia effectuar ina reducziun da la multa.

Il chantun ha alura manà discurs d'enclegientscha cun tut las interpresas interessadas. Quai sin basa d'ina cunvegna che ha definì il rom da las tractativas. Grazia a las enclegientschas pon vegnir evitadas proceduras lungas e charas. A medem temp vegnan stgaffidas las premissas per che la concurrenza tar las acquisiziuns da prestaziuns da construcziun funcziunia er en l'avegnir.

Nagina toleranza tar cartels da submissiun
Il chantun ha mussà cleramain ch'el n'accepta betg cunvegnas da cartel. Per prender sancziuns dal dretg davart las acquisiziuns e dal dretg civil vegn el dentant a resguardar er en ulteriurs cas en moda adequata la prontezza da las interpresas da gulivar il donn chaschunà e da garantir en il futur in bun cumportament concurrenzial. Sut quest aspect ha la regenza decidì d'offrir discurs d'enclegientscha er a las ulteriuras interpresas ch'èn involvidas en proceduras da la CUMCO, particularmain als impressaris da l'Engiadina bassa.


Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: regenza
Funtauna: rg chanzlia chantunala dal Grischun
Neuer Artikel