Zum Seiteninhalt

Dapli mustgins-tigher asiatics en il Grischun

Dapi l'onn 2016 fa l'uffizi per la natira e l'ambient – en collavuraziun cun tschertas vischnancas – in monitoring davart ils mustgins asiatics. Cun traplas d'ovs vegnan registrads per exempel mustgins-tigher u mustgins da chaglia. L'onn 2018 è vegnì constatà in ulteriur augment dals mustgins-tigher en la part sid da la Val Mesauc. En las vischnancas da Bregaglia e da Brusio sco er a Cuira èn per l'emprima giada vegnids confermads chats singuls. Suenter ina interrupziun l'onn 2017 èn l'onn passà puspè vegnids chattads ovs dal mustgin-tigher tar ils pausadis d'autostrada Viamala e Heidiland.

Il dumber da lieus, nua ch'il mustgin da chaglia asiatic viva, è er s'augmentà. Els èn vegnids registrads gia pli baud en quasi tut ils territoris da monitoring. Cuntrari al mustgin-tigher enconuschent vegn il mustgin da chaglia considerà tenor la classificaziun da la confederaziun sco vectur plitgunsch irrelevant per transmetter malsognas. Sco particularitad è il mustgin corean vegnì constatà pli savens en la Bregaglia envers l'onn 2017, ed en la vischnanca da Brusio è el vegnì scuvrì per l'emprima giada. Da quest mustgin corean è anc pauc enconuschent.

Intensivar las mesira da cumbat
En las vischnancas da la Val Mesauc cun colonias etablidas dal mustgin-tigher èn ils servetschs tecnics vegnids instruids gia l'onn 2017 davart las mesiras da cumbat. La realisaziun da las mesiras tras las vischnancas e l'infurmaziun da la populaziun davart mesiras preventivas vegnan ussa intensivadas. Ultra da l'allontanament da l'umiditad u dals lieus da cuar (p.ex. pitschnas accumulaziuns d'aua en sfessas, foras, sutvaschs, recipients da ruments) èn ils servetschs tecnics ultra da quai dumandads da cumbatter las larvas dal mustgin cun larvicids specifics directamain en ils tumbins per auas da via ed en autras accumulaziuns d'aua mal accessiblas.

Extensiun dal monitoring ed instrucziuns da cumbat en ulteriuras vischnancas

Pervia da l'augment da las colonias da mustgins e pervia dals novs chats vegn il monitoring dal mustgin cuntinuà l'onn 2019 ed extendì en tscherts lieus sco a Tusaun, a Domat, a Cuira ed a Zizers. Ils servetschs da mantegniment da las vischnancas da Cama, Bregaglia, Brusio e Cuira vegnan integrads da nov en las mesiras da cumbat. Els èn vegnids instruids correspundentamain.


Agiuntas:
- rapport da la stagiun 2018, monitoring davart ils mustgins asiatics da l'uffizi per la natira e l'ambient
- fegl d'infurmaziun davart il mustgin-tigher


Infurmaziuns:

Marco Lanfranchi,collavuratur scientific, uffizi per la natira e l'ambient, tel. 081 257 29 42, e-mail: Marco.Lanfranchi@anu.gr.ch  


Gremi: uffizi per la natira e l'ambient
Funtauna: rg uffizi per la natira e l'ambient

Video dal monitoring dal mustgin-tigher 2016