Per la chatscha auta da quest onn vegn introducida in'avertura cumpletta respectivamain parziala da differents asils da selvaschina sco mesira supplementara per augmentar la preda. Il squitsch da chatscha duai vegnir auzà cunzunt tar ils tschiervs feminins. Plinavant rimna l'uffizi da chatscha e pestga durant questa stagiun da chatscha datas davart l'effect da la muniziun grischuna. Quai serva sco basa da decisiun per in'eventuala introducziun da patronas senza plum.

Malgrà che las populaziuns da selvaschina d'ungla èn sa stabilisadas, dovri er vinavant ina regulaziun consequenta tras la chatscha. Quai mussa il fatg che l'influenza da la selvaschina sin il guaud e sin las culturas agriculas è fitg differenta da regiun a regiun. Cunzunt las populaziuns da tschiervs e da chavriels ston vegnir reguladas, per ch'ellas na creschian betg. En tschertas regiuns duain las populaziuns schizunt vegnir sminuidas. Tar questas duas spezias d'animals che sa multiplitgeschan fermamain, ston las populaziuns vegnir reguladas cun sajettar animals feminins. La finamira da la planisaziun da la chatscha da quest onn è perquai quella da tegnair quint da questa circumstanza cun differentas mesiras novas. Enconuschientschas or dal project da pilot ch'è gia vegnì realisà en il Partenz duain gidar a maximar la preda da chatscha auta. L'avertura totala respectivamain parziala da differents asils da selvaschina durant ils ultims dus dis da l'emprima mesadad da la chatscha auta ha l'intent d'augmentar il squitsch da chatscha e da cuntanscher ina repartiziun dals tschiervs. Durant quests dus dis han las chatschadras ed ils chatschaders la pussaivladad da sajettar animals feminins e tschiervs lantschets, independentamain da la lunghezza da las cornas, en ils secturs averts dals asils da selvaschina. Sin basa dal plan da prelevaziun da quest onn ston vegnir sajettads totalmain 5560 tschiervs. En cumparegliaziun cun il plan da prelevaziun da l'onn precedent èn quai quest onn 130 animals dapli.

Rapports da prelevaziun per mintga selvaschina d'ungla sajettada
Unicamain quest onn vegn fatg in scleriment cumplessiv davart l'effect da la muniziun grischuna dal caliber da 10,3 millimeters. Uschia duain resultar infurmaziuns davart l'abilitad dals divers products che vegnan offrids sin il martgà. Per las chatschadras grischunas ed ils chatschaders grischuns èsi obligatoric d'emplenir quest onn ils rapports da prelevaziun per mintga selvaschina d'ungla sajettada. Uschia duai er esser pussaivel d'evaluar il diever da muniziun senza plum. Perquai che restanzas da plum pon cumprovadamain chaschunar tissientadas en l'ambient ed en spezial tar utschels da preda, vegn examinada la pussaivladad da midar a muniziun senza plum.

Ulteriuras infurmaziuns: fegl uffizial dal chantun Grischun


Infurmaziuns:
Dr. Adrian Arquint, manader da l'uffizi da chatscha e pestga dal Grischun, tel. 081 257 38 92, e-mail Adrian.Arquint@ajf.gr.ch


Gremi: uffizi da chatscha e pestga
Funtauna: rg uffizi da chatscha e pestga