Zum Seiteninhalt

Retratga da las patentas per la stagiun da chatscha 2019

"La chatscha en il Grischun. Nua poss jau retrair la patenta?“

Gia oz spetgan las chatschadras ed ils chatschaders grischuns cun fevra la proxima stagiun da chatscha che cumenza quest onn il 2 da settember.
Ellas ed els fan las emprimas preparaziuns. Equipads cun il perspectiv e cun il telescop passentan ellas ed els mintga minuta libra en il territori da chatscha. Passiunadamain vegni "spievlà", observà la selvaschina e sias disas. A chasa vegnan rimnads ils utensils da chatscha, las victualias e las bavrondas per il transport en la chamona da chatscha. Èn vegnidas pajadas las taglias e l'assicuranza da responsabladad obligatorica? Han ellas ed els regulà persunalmain las armas da chatscha? Han ellas ed els absolvì cun success la cumprova obligatorica da la segirezza da culp? Questa cumprova sto vegnir preschentada per retrair mintga tip da patenta. Èn enconuschentas las novaziuns las pli impurtantas da las prescripziuns da chatscha chantunalas? E la finala, per terminar las preparaziuns, cura e nua pon ellas ed els retrair la patenta da chatscha?

Sin la pagina d'internet www.ajf.gr.ch ed en il fegl uffizial dal chantun Grischun dals 7 d'avust 2019 èn publitgads ils lieus, las datas e las uras da la vendita organisada da las patentas. En il museum da la natira dal Grischun pon vegnir retratgas patentas a partir dals 16 d'avust 2019. Al spurtegl dal museum da la natira dal Grischun resp. tar ils organs da surveglianza da chatscha èsi anc adina pussaivel da cumprar las patentas da chatscha en daner contant resp. cun cartas da debit. Acceptadas vegnan cartas sco Maestro u Postcard. L'import che sto vegnir pajà vegn tratg giu directamain da Voss conto senza quintar ina cumissiun. Las patentas pon er vegnir pajadas cun cartas da credit sco MasterCard u Visa, e cun TWINT.

Nus giavischain ina buna mira ed ina ritga preda!


Infurmaziuns:
Adrian Arquint, manader da l'uffizi da chatscha e pestga, tel. 081 257 38 92, e-mail Adrian.Arquint@ajf.gr.ch


Gremi: uffizi da chatscha e pestga
Funtauna: rg uffizi da chatscha e pestga