Zum Seiteninhalt

La cumissiun predeliberanta dal cussegl grond sustegna la renovaziun dal center da dietas al Plantahof

La cumissiun predeliberanta dal cussegl grond ha predeliberà la missiva da la regenza tar la renovaziun dal center da dietas Plantahof e sustegna unanimamain il project. Ella propona al cussegl grond d'approvar il credit d'impegn da 24,5 milliuns francs, ch'è necessari per quai.

La cumissiun ad hoc dal cussegl grond destinada per predeliberar la missiva da la regenza tar la renovaziun dal center da dietas Plantahof è sa scuntrada sin il lieu a Landquart ed ha tractà la fatschenta per mauns dal cussegl grond. A la sesida èn sa participads er cusseglier guvernativ Mario Cavigelli, schef dal departament da construcziun, traffic e selvicultura, represchentants da l'uffizi da construcziun auta sco er il directur dal Plantahof.

La regenza propona al cussegl grond da remplazzar la sala existenta e la cuschina cun in edifizi nov. A medem temp duai il convict che sa chatta actualmain sper la sala e la cuschina, vegnir construì da nov davos l'edifizi principal. Per quest project propona la regenza al cussegl grond da conceder in credit d'impegn en la summa da 24,5 milliuns francs.

Il basegn è cumprovà ed il proceder è correct
La cumissiun è sa laschada declerar en detagl il project per renovar la cuschina e la sala sco er ils alloschis ed – en la debatta detagliada – è ella pudì sa persvader che la renovaziun dal center da dietas saja tant necessaria sco er correcta. Uschia è la cumissiun s'occupada en emprima lingia da la dumonda, sch'il basegn saja cumprovà er per ils proxims onns ed alura en in segund pass da la dumonda, sch'in edifizi nov saja propi da preferir ad ina renovaziun dals edifizis existents. La cumissiun predeliberanta è arrivada unanimamain a la conclusiun che tuttas duas dumondas ston vegnir respundidas senza resalvas cun in gea, e propona al cussegl grond d'approvar il project ed il credit d'impegn. Perquai ch'il credit d'impegn da 24,5 milliuns francs è suttamess al referendum da finanzas obligatoric, vegn però il pievel grischun ad avair l'ultim pled en chapitel.

Il cussegl grond vegn a tractar questa fatschenta en la sessiun d'avust 2019.
 

Infurmaziuns:
president da la cumissiun Gian Peter Niggli, tel. 079 630 88 88


Gremi: cumissiun predeliberanta tar la renovaziun dal center da dietas Plantahof, Landquart
Funtauna: rg cumissiun predeliberanta tar la renovaziun dal center da dietas Plantahof, Landquart