La regenza ha deliberà ina contribuziun chantunala per ina nova punt per velos e per peduns en il Welschdörfli da Cuira. Ultra da quai ha ella dà glisch verda per engrondir in indriz d'ennavar a Tavau e per extender ina chava da crappa ad Andeer.

Nova punt per velos e per peduns en il Welschdörfli da Cuira
La regenza ha approvà il project da construcziun da la citad da Cuira per ina nova punt per velos e per peduns en il Welschdörfli. Ultra da quai ha ella deliberà ina contribuziun chantunala da maximalmain 936 000 francs per la realisaziun da quest project. Tenor ils plans da la citad da Cuira duai la nova punt per velos e per peduns manar sur la Plessur tranter la part sura da la Grabenstrasse e da la Sägenstrasse. La punt vegn a render d'ina vart la via tranter il center da la citad ed il quartier Cuira vest creschent e da l'autra vart al center administrativ chantunal "sinergia" pli directa, pli segira e pli attractiva per pedunas e peduns e per ciclistas e ciclists. Da la punt profita er il traffic individual motorisà, perquai che la rundella da l'Obertor, la bifurcaziun da la via taliana vers il sviament sid ed il Welschdörfli vegnan distgargiadas dal traffic da velo.

©Citad da Cuira, servetschs da construcziun bassa

Segirezza da naiv pli gronda en il territori da skis Rinerhorn
La regenza ha approvà ina revisiun parziala da la planisaziun locala che la vischnanca da Tavau aveva concludì ils 6 da december 2018. Cun quai è libra la via per engrondir l'indriz d'ennavar actual dal territori da skis Rinerhorn. Las telefericas Rinerhorn SA vulessan garantir uschia la segirezza da naiv durant il principi e la fin da l'enviern. Quai correspundia ad in basegn dals giasts d'enviern dad oz e saja indispensabel per garantir pussaivladads da trenar. La part centrala dal project è in nov lai d'accumulaziun Rieberalp cun ina capacitad da var 30 000 meters cubic aua. La retratga d'aua da fin ussa dal Rieberbach e dal Leidbach sco er dals sursculs da dus reservuars saja però suffizienta; l'aua stoppia però vegnir accumulada temporarmain en il futur en il lai d'accumulaziun che vegn a sa chattar al sidvest sut la staziun da val Nüllisch.

©Uffizi federal da topografia

Dapli reservas dal granit d'Andeer
La regenza ha approvà ina revisiun parziala da la planisaziun locala che la vischnanca dad Andeer aveva concludì ils 27 da mars 2018. Cun quai èn stgaffidas las premissas per extender la chava da crappa existenta Crap da Sal. Gia dapli ils onns 1950 vegn explotà là il ortognais tschertgà "granit d'Andeer".
Cun l'extensiun vegnan las reservas d'explotaziun dal granit d'Andeer d'actualmain var 80 000 meters cubic augmentadas sin ca. 680 000 meters cubic. Per quest intent vegn la zona d'explotaziun engrondida vers sidvest en direcziun da la muntogna. L'explotaziun da crappa en quest territori dura anc var 80 onns. En quest connex vegn tut l'areal cuntinuadamain puspè reemplenì e recultivà suenter che l'explotaziun è terminada. Cur che la reforestaziun e la furmaziun finala èn terminadas, restan probablamain duas furmaziuns da spelm sco er surfatschas da guaud cun bostgs e chaglias.

©Comet Photoshopping ScRL / Dieter Enz


Gremi: regenza
Funtauna: rg chanzlia chantunala dal Grischun