Zum Seiteninhalt

Communicaziun da la regenza dals 22 d'avust 2019

  • Erste Mitteilung
  • Neuen Beitrag einfügen
La regenza ha prendì posiziun tar ina revisiun planisada d'ina ordinaziun da la confederaziun che pussibilitass tranter auter la meztga sin il bain puril e sin la pastgira. Ultra da quai ha ella concedì ina contribuziun chantunala per la restauraziun da l'emprima locomotiva dal Grischun.

La regenza beneventa la meztga sin il bain puril e sin la pastgira mo cun resalvas
La regenza ha prendì posiziun davart midadas che la confederaziun ha planisà en ordinaziuns davart il dretg da victualias. En il rom da questa revisiun vegn prendida en mira in'armonisaziun cumplessiva cun il dretg da la UE. En il sectur dal dretg da victualias datti in basegn da revisiun permanent, perquai ch'i pudessan uschiglio resultar novas barrieras commerzialas envers la UE e perquai che la protecziun da la sanadad e cunter engion na fiss betg pli garantida cumplainamain.
Per quests motivs beneventa la regenza da princip la revisiun proponida. Cun las disposiziuns proponidas davart la meztga sin il bain puril e sin la pastgira è ella percunter d'accord mo cun resalvas. La revisiun prevesa da pussibilitar en l'avegnir la meztga sin il bain puril e sin la pastgira. Pervia da quai pretenda la regenza obligatoricamain adattaziuns e cumplettaziuns da las disposiziuns per garantir il nivel en spezial da la protecziun dals animals e da l'igiena sco ch'ella vegn pretendida da stabiliments da maz pitschens. Uschiglio smanatscha ina perdita da confidenza envers il servetsch veterinar. Ultra da quai vegn quai spetgà da la populaziun e da las consumentas e dals consuments, vul dir, pretensiuns main severas envers la moda e maniera da mazzar ils animals na vegnissan betg chapidas. Plinavant stuess la gronda lavur d'execuziun supplementara vegnir indemnisada tras taxas che cuvran ils custs.

Consultaziuns dal departament federal da l'intern

L'emprima locomotiva grischuna vegn sanada cumplettamain
La regenza ha garantì a l'uniun "historic RhB" ina contribuziun chantunala da maximalmain 160 000 francs per restaurar la locomotiva da vapur nr. 1 "Rhätia". Ils custs totals da quest project importan var 938 000 francs.
La locomotiva da vapur nr. 1 "Rhätia" è stada la pli emprima locomotiva dal parc da material rullant da la Viafier retica (VR), resp. da sia antecessura la Viafier Landquart Tavau. L'onn 1889 ha la "Rhätia" tratg il tren d'inauguraziun da Landquart a Claustra. Gia l'onn 1928 è ella vegnida messa d'ina vart per in museum naziunal da viafier futur e dapi l'onn 1970 è ella puspè vegnida duvrada per viadis da vapur. Igl è unic en Svizra che la VR posseda cun la locomotiva e cun anc dus chars da persunas ed in char da rauba ina cumposiziun cumpletta dal tren dal temp da fundaziun. Sco ina da las locomotivas las pli veglias e mantegnidas per gronda part en in stadi original è ella d'ina gronda valur areguard la tecnica ed areguard l'istorgia economica ed industriala e la referenza istorica da la Viafier retica.
Pervia da donns tecnics per motivs da vegliadetgna na po la "Rhätia" betg pli vegnir duvrada dapi l'onn 2014. La restauraziun cumplessiva che sto ussa vegnir fatga vegn exequida cun schanegiar il meglier pussaivel la substanza originala per pudair duvrar la locomotiva da 130 onns puspè durant decennis. Las lavurs vegnan fatgas en il lavuratori principal spezialisà, e quai da las uniuns ch'èn gia s'engaschadas per il mantegniment dal material rullant istoric.

-
Il tren d'inauguraziun tar ses arriv a Claustra l'onn 1889

Nova punt per la correcziun da la via da Stussavgia
La regenza ha approvà il project davart la correcziun da la via da Stussavgia tranter Rütiwald e Stussavgia Plaz. Sin quest traject na correspunda la ladezza dal vial betg a las pretensiuns odiernas. Ultra da quai ha la surstructura da la via donns ed è defurmada pervia da quai.
Il project cumenza en il Rütiwald e finescha curt avant l'entrada dal vitg a Stussavgia Plaz. Sin ils emprims 120 meters vegn il schlargiament necessari da la via fatg da la vart da la val. Il trassé nov traversa il Lochtobel sur ina punt nova da var 46 meters lunghezza. Suenter la punt fin a la fin dal project vegn il schlargiament fatg per gronda part da la vart da la muntogna. Per quest project vegnan duvrads var 7,9 milliuns francs.

-
©Uffizi federal da topografia

Renovaziun totala da la via da Selvaplana a Brusio
La regenza ha approvà in project per renovar totalmain la via da Selvaplana tranter Ginet e Selvaplana. Sin il traject d'ina lunghezza da var 1,5 kilometers èn vegnidas fatgas dapi ils onns 1970 mo las lavurs da mantegniment necessarias. Correspundentamain è la via ussa en in nausch stadi. Pervia da la ladezza n'èsi ultra da quai betg pussaivel per dus autos u per in camiun ed in velo da sa cruschar.
Cun il project approvà vegn la via ussa schlargiada a 4,2 meters. Ultra da quai vegnan las vias lateralas, las plazzas davantvart sco er las entradas e las sortidas existentas adattadas al trassé nov. Ils custs totals importan var 4,42 milliuns francs.

-
©Uffizi federal da topografia


Gremi: regenza
Funtauna: rg chanzlia chantunala dal Grischun
Neuer Artikel