Radetzky ha ses marsch, il Danubi ses valzer e la ARGE ALP prest sia atgna fanfara. Per quest intent ha la cuminanza da lavur da las regiuns alpinas publitgà ina concurrenza da cumposiziuns. Il premi per la cumposiziun victura è dotà cun 5000 euros.

"La cumposiziun victura vegn ad esser la fanfara uffiziala da la ARGE ALP a chaschun d'occurrenzas, sin sia pagina d'internet, sco identificaziun da ses videos e sco element marcant da questa uniun da diesch stadis federativs, regiuns e chantuns da quatter naziuns", di il guvernatur da Salzburg Wilfried Haslauer, ch'è actualmain il parsura.

Las Alps resunan
Tschertgada vegn ina fanfara cun ina lunghezza da 3 fin 5 minutas e cun ina versiun curta (melodia distinctiva da 7 fin 9 secundas) per maximalmain diesch musicistas e musicists. L'ovra duai reflectar en musica il spazi da viver da las Alps, ils princips da la ARGE ALP, tradiziun ed innovaziun, la chapientscha vicendaivla e la responsabladad cuminaivla, pia l'idea fundamentala da questa instituziun. La cumponista u il cumponist sco er las musicistas ed ils musicists ston derivar dals stadis commembers da la ARGE ALP u avair là lur center da vita.

Annunzia fin ils 31 da mars 2020
Annunzias èn pussaivlas fin ils 31 da mars 2020. Selecziunà vegni en ina procedura da dus stgalims, l'emprim sin plaun regiunal e suenter d'ina giuria spezialisada internaziunala. Surdads vegnan il premi victur per la fanfara da la ARGE ALP en la summa da 5000 euros sco er dus ulteriurs premis da la ARGE ALP en la summa da mintgamai 1000 euros.

Invitaziun a Salzburg
La primaudiziun da la fanfara uffiziala victura ha lieu – sin invitaziun da la cuminanza da lavur da las regiuns alpinas – a chaschun da la conferenza da las scheffas e dals schefs da las regenzas da la ARGE ALP ils 2 ed ils 3 da fanadur 2020 a Salzburg. Ulteriuras pussaivladads da preschentar l'ovra vegnan actualmain anc scleridas.

Partitura e registraziun originala
Inoltradas ston vegnir – sut "Concurrenza da cumposiziun da la ARGE ALP" – la partitura per la fanfara sco er per la versiun curta ed ina registraziun originala da las ovras en il format da MP3. Las annunzias ston vegnir drizzadas a:

Chanzlia chantunala dal Grischun
Servetsch da medias / Tamara Freuler
Reichsgasse 35
7001 Cuira
Tamara.Freuler@staka.gr.ch  

Tut las infurmaziuns chattan ins sin www.argealp.org.


Diesch commembers da quatter pajais
Dapi sia fundaziun l'onn 1972 è la ARGE ALP ina rait impurtanta per la collavuraziun transcunfinala, sch'i sa tracta da defender ils interess dal territori alpin. Cunzunt sin champ ecologic, cultural, social ed economic. En ils quatter pajais Austria, Germania, Italia e Svizra collavuran ils suandants stadis federativs e chantuns sco er las suandantas provinzas cun ina populaziun totala da circa 26 milliuns persunas: Baviera, Grischun, Lumbardia, Salzburg, Son Gagl, Tessin, Tirol, Tirol dal sid, Trentino e Vorarlberg.


Infurmaziuns:
Tamara Freuler, incumbensada per l'infurmaziun dal chantun Grischun, tel. 081 257 22 28, e-mail Tamara.Freuler@staka.gr.ch


Gremi: cuminanza da lavur da las regiuns alpinas (ARGE ALP)
Funtauna: rg cuminanza da lavur da las regiuns alpinas (ARGE ALP)