Zum Seiteninhalt

Paratuberculosa en in grond manaschi da chauras en il Puschlav

  • Erste Mitteilung
  • Neuen Beitrag einfügen
Ils 29 d'october 2019 han stuì vegnir mazzadas e dismessas 145 chauras en in grond manaschi da chauras en il Puschlav pervia da paratuberculosa. Dapi il mars 2018 è l'epidemia d'animals, ch'è in'epidemia da cumbatter, adina puspè vegnida diagnostitgada tar singuls animals.

Sa basond sin la legislaziun federala davart epidemias d'animals ha l'uffizi per la segirezza da victualias e per la sanadad d'animals (USVA) cumbattì cunter l'epidemia d'animals cun mazzar e cun dismetter animals che avevan sintoms clinics ed in'analisa positiva dal labor. Il squitsch d'infecziun è la finala stà uschè grond ch'ins ha – sco ultima mesira pussaivla – stuì ordinar da mazzar l'entira muntanera. Tut en tut èn crappadas en quest manaschi 210 chauras pervia da questa malsogna incurabla.

Incurabel e strusch visibel
La paratuberculosa è ina malsogna bacteriala cronica che fa smagrir ils animals e che chaschuna la mort. La paratuberculosa survegnan arments e chauras, pli darar nursas e remagliaders selvadis. Terapias n'existan betg; ils animals infectads ston perquai vegnir eliminads. Sche e co che la malsogna morbus Crohn tar l'uman stat en connex cun la paratuberculosa tar l'animal, n'è betg anc enconuschent definitivamain. Mo ina pitschna part dals animals infectads sviluppa sintoms visibels e mo animals da passa 2 onns survegnan questa malsogna. Perquai na vegn la paratuberculosa savens betg percurschida durant in temp pli lung. Il scherm infectus è il mycobacterium avium subsp. paratuberculosis (MAP). Ils animals s'infecteschan principalmain en moda orala sur excrements contaminads u sur latg che cuntegna scherms infectus. Er sur il sperma vegn secretà il scherm infectus.

Normalmain s'infecteschan mo singuls animals pli vegls d'in manaschi. Correspundentamain prevesa er la legislaziun federala davart epidemias d'animals che mo animals malsauns, che han a medem temp sintoms clinics ed in'analisa positiva dal labor, vegnian mazzads ed indemnisads sur il fond cunter epidemias d'animals. En il cas qua avant maun èn il squitsch d'infecziun ed il dumber d'animals crappads stads uschè gronds ch'igl è – sco ultima mesira pussaivla – mo pli vegnì en dumonda da mazzar e da dismetter l'entira muntanera.

In'ulteriura infecziun en la val n'è betg probabla
La paratuberculosa n'è betg in'epidemia d'animals fitg contagiusa. Ils ultims onns n'ha il manaschi da chauras strusch gì contact cun auters animals e n'ha er betg alpegià sias chauras ensemen cun auters manaschis. Plinavant n'è vegnì mess en circulaziun nagin latg l'onn passà. La probabilitad che auters manaschis da chauras en la val sajan vegnids infectads, è perquai pitschna. Il USVA intensivescha la surveglianza e las controllas da charn. Plinavant vegnan sensibilisads veterinarias pratitgantas e veterinaris pratitgants sco er possessuras e possessurs d'animals en la regiun.

Ultra da las collavuraturas e dals collavuraturs dal USVA e dal veterinari local èn er 15 piuniers da cumbat cunter epidemias da la protecziun civila stads en acziun durant 3 dis per dismetter la muntanera e per nettegiar e dischinfectar las stallas.

In cas extraordinari en Svizra
Tenor la statistica da l'uffizi federal da segirezza alimentara e fatgs veterinars datti en Svizra mintga onn maximalmain 10 cas da paratuberculosa tar chauras. I sa tracta dentant adina da singuls animals che vegnan malsauns e moran u che ston vegnir mazzads. In cas da tala dimensiun è fitg extraordinari. Per quest motiv collavura il USVA – en quest cas d'epidemia – stretgamain cun ils instituts universitars ed ha incumbensà quels da far ulteriuras retschertgas cun ina schelta da cadavers.

Fotografias agiuntadas:
-

-


Infurmaziuns:
Giochen Bearth, veterinari chantunal, uffizi per la segirezza da victualias e per la sanadad d'animals, tel. 081 257 24 11, e-mail Giochen.Bearth@alt.gr.ch


Gremi: uffizi per la segirezza da victualias e per la sanadad d'animals
Funtauna: rg uffizi per la segirezza da victualias e per la sanadad d'animals
Neuer Artikel