Il fenomen è enconuschent: Cun l'emprima naiv cumparan tschiervs en ils vitgs, cumbain ch'els na pateschan betg anc da l'enviern. Ils motivs èn chattads svelt: pavladas carmalan ils animals en ils abitadis. Ch'i saja faussa amur per animals u negligientscha: la purschida da pavel en il territori abità po avair consequenzas fatalas per ils tschiervs, sco quai ch'in exempel d'Arosa mussa.
Carmalà natiers da mantuns da cumpost, da chasettas d'utschels e d'autras funtaunas da pavel sa trategneva quest animal selvadi en ils vitgs alpins d'Arosa e da Langwies. Pervia da ses cumportament è el daventà ina ristga per la segirezza, uschia che la surveglianza da chatscha ha stuì sajettar il tschierv il cumenzament da december.
Ruments da plastic eran per part onns a la lunga en il magun
L'analisa dal cadaver ha manà a la glisch 6 kilos ruments da plastic: guants da plastic, cordas, raits da pavel d'utschels e bler auter. Las restanzas chattadas en il magun eran per part gia onns a la lunga en il corp da l'animal. Il tschierv pasava in bun pau main ch'in animal cumparegliabel da la medema vegliadetgna.
Pavlar selvaschina chaschuna conflicts e periclitescha ils animals selvadis
La lescha chantunala da chatscha scumonda da pavlar activamain e passivamain animals selvadis. Tuttina vegnan animals selvadis adina puspè carmalads en la vischinanza dals abitadis tras funtaunas da nutriment. Il potenzial da privels è multifar en quest connex. Tschertgond pavel traversan ils animals vias, lingias da viafier e saivs, quai che po chaschunar situaziuns privlusas. Cun il pavel exponì mangian ils animals er parts da plastic ed auters ruments ch'els na pon betg pli excretar. Cur ch'ils animals selvadis tschertgan nutriment, pon dentant er vegnir donnegiadas persunas e chaussas. Ils tschiervs perdan pli e pli lur timiditad natirala e na fugian betg en preschientscha d'umans.
Fotografias agiuntadas:
Infurmaziuns:
Hannes Jenny, vicemanader da l'uffizi da chatscha e pestga, tel. 081 257 38 92 (cuntanschibel a partir da las 13.30), e-mail Hannes.Jenny@ajf.gr.ch
Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun