Per la nova stagiun da pestga lantschan l'Uffizi da chatscha e pestga (UCP) e l'Uffizi d'agricultura e da geoinfurmaziun (UAG) in servetsch da chartas interactiv per pestgadras e pestgaders e per la publicitad interessada. Cun il MapService-pestga pon vegnir consultadas cun paucs clics da la mieur infurmaziuns specificas per las auas che stattan en connex cun la pestga en il Grischun.

Il material cartografic digital duai satisfar en emprima lingia al basegn d'infurmaziun da las pestgadras e dals pestgaders. Consultadas na pon betg mo vegnir indicaziuns davart las differentas spezias da peschs en il Grischun e davart ils lieus nua ch'ellas vivan, mabain er las disposiziuns davart la pestga en las differentas auas.

Grazia a l'interactivitad ad infurmaziuns individualas
Fin ussa han las pestgadras ed ils pestgaders en il chantun Grischun survegnì – ensemen cun la patenta – ina versiun stampada da la charta da pestga. Questa charta vegni anc a dar er en l'avegnir. Cun il MapService digital duai però vegnir stgaffida ina purschida supplementara. Quella duai pudair vegnir consultada per code QR u sur in link en l'internet. Cun ina funcziun da zoom e cun filters selectivs po l'utilisadra u l'utilisader survegnir las infurmaziuns giavischadas davart ils 1500 kilometers d'auas currentas e davart ils passa 200 lais. Ultra da quai pon las indicaziuns tschernidas vegnir mussadas, stampadas u chargiadas giu sco document.

Link al MapService-pestga: http://map.geo.gr.ch/fischerei
Code QR:

Fotografia agiuntada:

Preschentaziun exemplarica da la tscherna da la charta e dal tema 


Infurmaziuns:
dr. Marcel Michel, biolog da pestga, Uffizi da chatscha e pestga dal Grischun, tel. 081 257 38 92, e-mail Marcel.Michel@ajf.gr.ch


Gremi: Uffizi da chatscha e pestga
Funtauna: rg Uffizi da chatscha e pestga