Navigaziun principala

Cuntegn da la pagina

Communicaziun da la Regenza dals 27 da favrer 2020

  • Erste Mitteilung
  • Neuen Beitrag einfügen
La Regenza ha approvà in project da sanaziun cunter la canera a Schlarigna ed ha dublegià la contribuziun chantunala per ils spirituals en il stabiliment giudizial Cazas Tignez.

Mesiras da protecziun cunter la canera per dapli quietezza a Schlarigna

La Regenza ha approvà in project per sanar la via d'Engiadina cunter la canera davent da l'entrada dal vitg da Schlarigna entaifer il cunfin communal. Per reducir las immissiuns creschentas da canera èn vegnidas examinadas differentas mesiras da protecziun cunter la canera, sco per exempel mesiras per diriger il traffic, adattaziuns da las prescripziuns da sveltezza, il remplazzament da cuvridas existentas da la via u obstachels cunter il sun. En il rom dal project vegnan ussa realisadas differentas da questas mesiras examinadas.

Il project prevesa tranter auter da construir duas paraids da protecziun cunter la canera d'ina lunghezza totala da 765 meters. L'emprima paraid, ch'è 120 meters lunga e 2 meters auta, è ina construcziun dal chantun per lung da la via d'Engiadina. La segunda paraid da protecziun cunter la canera sa cumpona d'ina part dal chantun e d'ina part da la vischnanca. La part dal chantun per lung dal vial d'access da Schlarigna en direcziun da San Murezzan è circa 2 meters auta e 45 meters lunga. Lura suonda la part da la paraid da la vischnanca. Quella è 600 meters lunga ed 1,5 fin 2 meters auta e maina da la via d'Engiadina fin a l'ovra electrica. Igl è vegnì guardà spezialmain da mantegnair la caracteristica dal traject da via e d'integrar la nova paraid da protecziun cunter la canera uschè bain sco pussaivel en la cuntrada. Ils custs totals per construir l'entira installaziun da protecziun cunter la canera importan circa 1,78 milliuns francs. Da quels van circa 0,44 milliuns francs a quint dal chantun.

Sin il vial d'access en direcziun da San Murezzan vegn ultra da quai introducida ina reducziun da la sveltezza maximala. Igl è previs da reducir la sveltezza maximala admessa sin l'emprima part dal vial d'access dad actualmain 80 km/h a 50 km/h. Sin la via d'Engiadina sco er sin il vial d'access vegnan plinavant gia installadas cuvridas che chaschunan damain canera.
-

©Uffizi federal da topografia
(paraid da protecziun cunter la canera mellen: chantun / blau: vischnanca)

La Regenza ha approvà in project per sanar la via d'Engiadina cunter la canera davent da l'entrada dal vitg da Schlarigna entaifer il cunfin communal.

Contribuziuns pli autas per ils spirituals en il stabiliment giudizial Cazas Tignez

La Regenza ha concludì da dublegiar la contribuziun chantunala per ils servetschs pastorals en il stabiliment giudizial grischun Cazas Tignez. La pastoraziun evangelica e catolica vegn indemnisada a partir dal 1. da fanadur 2020 tut en tut cun maximalmain 60 000 francs ed a partir dal 1. da schaner 2021 cun maximalmain 80 000 francs. Quest augment ha lieu pervia da las midadas dals dumbers da praschuniers. Il nov stabiliment giudizial serrà Cazas Tignez ha plazza per 152 praschuniers, entant ch'il stabiliment giudizial Sennhof aveva plazza mo per 52 praschuniers. En ils stabiliments giudizials grischuns porschan spirituals evangelics e catolics regularmain uras d'audienza e d'uraziun sco er servetschs divins. Ils spirituals ecclesiastics stattan ultra da quai a disposiziun er a persunas senza confessiun ed ad appartegnents d'autras cuminanzas religiusas.

La Regenza ha concludì da dublegiar la contribuziun chantunala per ils servetschs pastorals en il stabiliment giudizial grischun Cazas Tignez. 

Neuer Artikel

Gremi: Regenza
Funtauna: rg Chanzlia chantunala dal Grischun