Navigaziun principala

Cuntegn da la pagina

gr.feel-ok.ch – per ch'ils giuvenils grischuns hajan in stil da viver saun

  • Erste Mitteilung
  • Neuen Beitrag einfügen

Durant la pubertad èn ils giuvenils e lur geniturs fatschentads cun temas multifars. Feel-ok.ch è il portal d'internet principal sin plaun naziunal che dat als giuvenils sustegn per concepir lur stil da viver uschia, che lur sanadad vegn promovida. El porscha cuntegns scientificamain fundads davart dependenzas, davart la sanadad corporala e psichica sco er davart incumbensas da svilup, sco professiun e sexualitad. Cun gr.feel-ok.ch è disponibla a partir d'immediat ina versiun grischuna dal portal d'internet.

Il chantun Grischun sustegna la versiun chantunala dal portal d'internet feel-ok.ch en il rom da las mesiras da prevenziun. A partir dal mars 2020 stattan a disposiziun sin gr.feel-ok.ch a las gruppas en mira dal Grischun infurmaziuns specificas davart purschidas, occurrenzas e posts spezialisads locals. La versiun chantunala cuntegna links a purschidas da cussegliaziun, ad occurrenzas ed a posts spezialisads cun tematicas specificas. Uschia datti in access pli facil a purschidas specificas per giuvenils e per lur geniturs. Da mez mars fin mez avrigl realisescha il chantun ultra da quai ina campagna online sin ils chanals Instagram, Youtube e Facebook, cun la finamira da render pli enconuschenta la versiun chantunala gr.feel-ok.ch tar ils giuvenils e tar ils geniturs.

Rait naziunala per la prevenziun da sanadad

Feel-ok.ch è vegnì sviluppà avant 20 onns per motivar e per sustegnair ils giuvenils da betg fimar. Gia lura eri enconuschent ch'in program da prevenziun dal tubac duai cumpigliar pliras tematicas, perquai ch'il cumportament da consum dals giuvenils stat en in effect reciproc cun autras dimensiuns, sco stress, confidenza en sasez e relaziun. Oz porscha il portal d'internet feel-ok.ch cuntegns detagliads per giuvenils davart dependenzas (alcohol, tubac e cannabis), davart la sanadad corporala (moviment e nutriment) e psichica (stress, disturbis psichics) sco er davart incumbensas da svilup (professiun, sexualitad). Ils cuntegns sa drizzan d'ina vart als giuvenils sezs, da l'autra vart dentant er a las persunas d'instrucziun ed als geniturs che pon sustegnair il svilup psicosocial dals giuvenils.

Gratuit e senza reclamas

Fin oz è feel-ok.ch vegnì finanzià per gronda part cun daners publics. Feel-ok.ch po vegnir duvrà gratuitamain e na cuntegna naginas reclamas. Purtada vegn la plattafurma d'internet da RADIX, in center da cumpetenza naziunal per il svilup e per la realisaziun da mesiras da la sanadad publica e dal svilup duraivel. RADIX procura ch'ils cuntegns sajan formulads en ina moda ch'è adequata per ils giuvenils e per l'internet. Per la professiunalitad dals cuntegns èn responsablas passa 40 organisaziuns renumadas, che controlleschan er cuntinuadamain la qualitad dals cuntegns. 

Dapli infurmaziuns: gr.feel-ok.ch


Infurmaziuns:

Denise Rudin, Uffizi da sanadad, manadra da la partiziun Promoziun da la sanadad e prevenziun, vicemanadra dal Program grischun cunter l'alcohol, tel. 081 257 64 02 u 078 746 42 20, e-mail Denise.Rudin@san.gr.ch


Gremi: Uffizi da sanadad
Funtauna: rg Uffizi da sanadad

Neuer Artikel