Cuntegn da la pagina

Entrada en vigur e realisaziun da la revisiun parziala da la Lescha chantunala davart la protecziun da l'ambient

  • Erste Mitteilung
  • Neuen Beitrag einfügen

La revisiun parziala da la Lescha chantunala davart la protecziun da l'ambient concernent ils implants da tir, ch'era vegnida concludida en la sessiun d'october 2019, entra en vigur il 1. d'avrigl 2020.

La Lescha chantunala davart la protecziun da l'ambient prevesa da nov ch'ils implants da tir vegnian equipads fin ils 31 da december 2020 cun sistems da tschiffaballas artifizials senza emissiuns. Cas cuntrari perdan il chantun e las vischnancas contribuziuns federalas da plirs milliuns francs per sanar ils lieus contaminads dals implants da tir. Pertutgads èn anc var 60 implants da tir dals secturs militar, chatscha e sport. Bleras vischnancas ed uniuns han gia garantì ch'ellas equipeschian lur implants da tir fin la fin da l'onn 2020 cun sistems da tschiffaballas artifizials.

Regulaziun dals detagls en l'Ordinaziun chantunala davart la protecziun da l'ambient

Ils detagls vegnan reglads en l'Ordinaziun chantunala davart la protecziun da l'ambient. Ils sistems da tschiffaballas artifizials ston correspunder al stadi da la tecnica. Per stans da tir da 300 m, da 50 m e da 25 m sco er per implants da tir da chatscha cun nodas fixas sa drizza il stadi da la tecnica tenor las directivas da l'Armada svizra. Er indrizs cun portg selvadi ed indrizs cun lieur che cupitga ston vegnir equipads cun sistems da tschiffaballas spezials.

Las largias tranter las singulas chaschas da tschiffaballas ston vegnir serradas cun plattas d'atschal ch'èn surtratgas cun ina vetta da polietilen. Ils mantuns da laina, ch'eran usitads pli baud, na bastan betg pli. L'ordinaziun prevesa termins transitorics da plirs onns per questa adattaziun.

Sin implants da tir sin columbas d'arschiglia, nua che sistems da tschiffaballas artifizials n'èn betg pussaivels, dastgi vegnir duvrà mo pli muniziun senza plum e columbas d'arschiglia senza substanzas nuschaivlas.

Implants da tir senza tschiffaballas artifizials èn serrads a partir da l'onn 2021

Implants da tir che n'adempleschan betg las pretensiuns fin ils 31 da december 2020, vegnan serrads tras lescha. Las vischnancas èn obligadas d'annunziar eventuals implants serrads a l'Uffizi per la natira e l'ambient (UNA).

A partir dal 1. da schaner 2021 èn il tir obligatoric ed il tir per la chatscha mo pli pussaivels sin implants cun sistems da tschiffaballas artifizials. Ils uffizis pertutgads collavuran stretgamain in cun l'auter. A las vischnancas ed a las secziuns da chatschaders vegni recumandà da tschertgar uschè svelt sco pussaivel in lieu substitutiv, sch'ellas na pon betg equipar lur implant da tir fin la fin da quest onn cun sistems da tschiffaballas artifizials.

Entrada en vigur

La Regenza ha mess en vigur la revisiun parziala da la Lescha chantunala davart la protecziun da l'ambient, ch'era vegnida concludida dal Cussegl grond en la sessiun d'october 2019, per il 1. d'avrigl 2020. Plinavant ha ella approvà la revisiun parziala da l'Ordinaziun chantunala davart la protecziun da l'ambient. Quella entra en vigur suenter l'approvaziun tras la Confederaziun.

Infurmaziuns:

- Remo Fehr, manader da l'Uffizi per la natira e l'ambient, tel. 081 257 29 46, e-mail Remo.Fehr@anu.gr.ch
- Martin Bühler, manader da l'Uffizi da militar e da protecziun civila, tel. 081 257 35 22, e-mail Martin.Bühler@amz.gr.ch
- Adrian Arquint, manader da l'Uffizi da chatscha e pestga, tel. 081 257 38 91, e-mail Adrian.Arquint@ajf.gr.ch


Gremi: Regenza
Funtauna: rg Departament d'educaziun, cultura e protecziun da l'ambient

Neuer Artikel