Navigation

Inhaltsbereich

  • Erste Mitteilung
  • Neuen Beitrag einfügen

Il dumber da persunas infectadas cun il coronavirus s'augmenta vinavant fermamain en il chantun Grischun. La Confederaziun ha extendì oz sias mesiras. La Regenza grischuna ha analisà conscienziusamain la situaziun actuala ed ha declerà la situaziun per il chantun Grischun sco situaziun "extraordinaria". Plinavant ha ella concludì in pachet da mesiras rigurusas. La finamira è quella da franar uschenavant sco pussaivel l'augment massiv dal dumber da persunas malsaunas. Per coordinar e per diriger la situaziun vegn engaschà a partir d'immediat il Stab directiv chantunal (SDC).

La Regenza ha declerà la situaziun per il chantun Grischun sco situaziun "extraordinaria"
Il dumber creschent da persunas infectadas, la nova situaziun als cunfins, la serrada da las scolas betg obligatoricas e las restricziuns supplementaras per occurrenzas han effectuà che la Regenza ha proclamà la "situaziun extraordinaria" per il chantun Grischun. Per giuditgar la situaziun han las cifras starmentusas dal chantun Tessin giugà ina rolla decisiva. Il dumber da persunas infectadas ed ospitalisadas s'augmenta là rasantamain e sa dublegia mintga segund di. Tenor la Lescha davart la protecziun da la populaziun è inditgada ina "situaziun extraordinaria", sch'ils meds da las vischnancas e dal chantun na bastan betg pli per ademplir lur incumbensas u sch'in grond dumber da persunas è pertutgà. Quai è ussa il cas. La direcziun vertenta vegn transferida da l'Uffizi da sanadad al Stab directiv chantunal.

Il dumber da persunas malsaunas crescha – ina retardaziun è urgentamain necessaria
Er en il chantun Grischun crescha rapidamain il dumber da persunas infectadas cun il coronavirus. Actualmain è il virus vegnì confermà tar 43 persunas (stadi dad oz en damaun). Tenor la strategia da l'Uffizi federal da sanadad publica na vegnan dentant fatgs pli nagins tests da maniera cumplessiva. Tests vegnan fatgs mo pli cun persunas da las gruppas da ristga che han sintoms sco er cun pazientas e pazients che han sintoms spezialmain grevs. Ils cas confermads servan pia sco indicatur, n'expriman dentant betg il dumber definitiv da persunas infectadas cun il coronavirus en il chantun. Per las persunas responsablas dal sectur da sanadad èsi cler ch'ins sto franar considerablamain l'augment da persunas malsaunas, perquai ch'il sistem da sanadad vegn uschiglio ad esser surchargià entaifer curt temp.

Vast pachet da mesiras
Per quest motiv ha la Regenza grischuna concludì oz las suandantas mesiras.

A partir d'immediat ils territoris da skis ston serrar lur manaschi.

    A partir da sonda, ils 14 da mars 2020, a las 08.00, per entant fin ils 30 d'avrigl 2020, a las 24.00, vala:

  1. L'Uffizi da militar e da protecziun civila vegn incumbensà da stabilir la prontezza a l'acziun da la Protecziun civila per sustegnair il sectur da sanadad.
  2. Tut las activitads d'uniuns sco eveniments sportivs, occurrenzas, radunanzas, trenaments, emprovas e.u.v. èn scumandadas.
  3. Occurrenzas publicas e privatas u radunanzas cun pli che 50 persunas, che na pertutgan betg las disposiziuns numnadas qua survart, èn scumandadas. L'autoritad chantunala cumpetenta po permetter excepziunalmain occurrenzas, sche interess publics predominants pretendan quai, per exempel occurrenzas per far diever dals dretgs politics.
  4. Occurrenzas religiusas cun pli che 50 persunas èn scumandadas.
  5. La visita en ospitals, en chasas da persunas attempadas e da tgira ed en autras instituziuns da tgira e d'assistenza è scumandada. Davart excepziuns (visitas per pazientas e pazients en situaziuns extraordinarias: geniturs d'uffants, partenaris da parturidras sco er confamigliaras e confamigliars da persunas muribundas u da pazients che basegnan sustegn) decida l'instituziun.
  6. Per tut las autras occurrenzas ed en tut ils negozis ston las persunas responsablas procurar che las reglas da l'igiena e da la distanza sociala vegnian observadas.
  7. A partir da sonda, ils 14 da mars 2020, a las 17.00, per entant fin ils 30 d'avrigl 2020, a las 24.00, vala:

  8. Tut las instituziuns da divertiment sco bibliotecas, archivs, kinos, teaters, museums, centers da giuventetgna, da sport, da wellness e da fitness, bogns, discotecas, bars da musica, nightclubs, eroticclubs e.u.v. ston serrar lur manaschi.
  9. A manaschis d'hotellaria e da restauraziun, cun excepziun da las instituziuns da divertiment numnadas qua survart e/u da parts dal manaschi, èsi permess da cuntinuar cun lur manaschi sut las suandantas cundiziuns:
    • garanzia dals standards d'igiena pli gronds e da la distanza sociala necessaria;
    • nagin autoservetsch;
    • observaziun d'ina distanza d'almain 1 meter tranter las maisas;
    • garanzia d'ina surfatscha minimala da 4 meters quadrat da la surfatscha da manaschi per giast preschent u da maximalmain 50 giasts preschents.

    A partir da glindesdi, ils 16 da mars 2020, a las 06.00, per entant fin ils 30 d'avrigl 2020, a las 24.00, vala:

  10. Ils territoris da skis ston serrar lur manaschi.
  11. L'instrucziun da preschientscha sin il stgalim secundar II (incl. curs intermanaschials, purschidas transitoricas e lavuratoris d'emprendissadi) e sin il stgalim terziar vegn scumandada. Resalvadas restan eventualas mesiras pli severas da la Confederaziun, en spezial en il sectur da l'instrucziun da la scola fundamentala (scola obligatorica), da las scolinas e da las canortas d'uffants.
  12. Nua che quai è pussaivel e raschunaivel, vegni ordinà tar l'administraziun chantunala da lavurar a chasa (homeoffice).

A la populaziun recumonda la Regenza urgentamain d'observar strictamain las reglas da l'igiena e da la distanza sociala en las relaziuns interumanas, cunzunt envers persunas sur 65 onns ed envers gruppas ch'èn valitadas sco periclitadas. A persunas sur 65 onns sco er a persunas da gruppas ch'èn valitadas sco periclitadas e ch'èn pia spezialmain expostas a la ristga da survegnir cumplicaziuns gravantas, las qualas pudessan metter en privel lur vita, vegni scusseglià urgentamain:

  • da tgirar uffants e giuvenils;
  • da sa participar ad occurrenzas publicas u privatas;
  • da duvrar ils meds da transport publics.

Sustegn per l'economia e per il turissem
La Regenza grischuna vul sustegnair il meglier pussaivel l'economia ed il turissem en questa situaziun difficila. Per quest intent nominescha ella ina task force cun represchentantas e represchentants dal Departament d'economia publica e fatgs socials, dal Departament da finanzas e vischnancas sco er da la Banca chantunala grischuna.

Traffic public: Tegnair en funcziun il manaschi ed augmentar la protecziun
I vegn garantì ch'il traffic public tegnia en funcziun ses manaschi. Las interpresas da transport èn responsablas per augmentar las mesiras da protecziun per il persunal sco er per las passagieras ed ils passagiers. Plinavant stoi vegnir planisà, co ch'il traffic public po vegnir garantì er en cas da mancanza da persunal. Per quest intent ha il chantun nominà ina gruppa da lavur ed è en stretg contact permanent cun la Confederaziun, cun la Viafier retica, cun l'AutoDaPosta sco er cun represchentantas e represchentants dal Departament da construcziun, traffic e selvicultura e da las interpresas da transport e cun auters gestiunaris da traffic public.

Stop d'operaziuns betg immediatamain necessarias
Per il temp a partir da la sonda ha l'Uffizi da sanadad ordinà in stop da tut las operaziuns betg immediatamain necessarias en las suandantas instituziuns:

  • Centro sanitario Valposchiavo
  • Center da sanadad d'Engiadina Bassa
  • Ospital da l'Engiadin'Ota a Samedan
  • Clinica Gut a San Murezzan

Uschia vegnan libras en questas instituziuns capacitads per pazientas e pazients dal coronavirus, ed il persunal po s'occupar pli fitg da questas persunas.

"Prender distanza per uschia tegnair ensemen!"
Las finamiras centralas èn er vinavant quellas da proteger las gruppas da ristga e da franar la derasaziun. La Regenza appellescha instantamain a la populaziun – en spezial er a las persunas saunas ed a las persunas giuvnas – d'observar las instrucziuns da cumportament da la Confederaziun. En il center stettia ina distanza sauna envers autras persunas. "Prender distanza per uschia tegnair ensemen!" sa cloma il motto da la Regenza grischuna.

 Gruppas da ristga
Persunas a partir da 65 onns
Persunas che han cunzunt las suandantas malsognas:
  • pressiun dal sang auta
  • diabetes
  • malsognas dal cor e da la circulaziun
  • malsognas cronicas da la via respiratorica
  • cancer
  • malsognas e terapias che flaivlentan il sistem d'immunitad

Infurmaziuns per la populaziun

Per ulteriuras infurmaziuns per mauns da la populaziun renviescha il chantun Grischun a la suandanta pagina d'internet: www.gr.ch/coronavirus

Per dumondas generalas per telefon stat a disposiziun a la populaziun da lingua tudestga la lingia d'infurmaziun da l'Uffizi federal da sanadad publica:
Telefon: +41 58 463 00 00 (mintga di, di e notg)

Infurmaziuns a la populaziun da lingua taliana dat la hotline dal chantun Tessin:
Telefon: 0800 144 144 (mintga di da las 7.00 a las 22.00)

Infurmaziuns per las collavuraturas ed ils collavuraturs da las medias, per il sectur da sanadad, per las vischnancas e per las scolas
Dumondas pon vegnir drizzadas er vinavant directamain al post da communicaziun per il coronavirus:

-

Uras da manaschi: glindesdi fin venderdi da las 08.00 a las 17.00

E-mail medias: kfsmedien@amz.gr.ch  
E-mail sectur da sanadad: kfsmedical@amz.gr.ch 
E-mail vischnancas e scolas: kfsinfo@amz.gr.ch 
Telefon: +41 81 254 16 00


Gremi: Regenza
Funtauna: rg Chanzlia chantunala

Neuer Artikel