La Regenza dal chantun Grischun è s'occupada oz da la situaziun speziala da las vals dal Grischun dal sid. Ina delegaziun da la Regenza e dal Stab directiv chantunal vegn a visitar la regiun Moesa e l'Engiadina, ed a sa scuntrar cun represchentantas e represchentants da las regiuns cunfinantas cun il Tessin e cun l'Italia. En concordanza cun la Confederaziun refusa la Regenza da serrar cumplettamain tut ils plazzals.
Pervia da lur vischinanza cun il Tessin e cun l'Italia han las vals dal Grischun talian e l'Engiadina sfidas spezialas en la crisa dal coronavirus. Numerusas interpresas publicas dependan da collavuraturas e collavuraturs che penduleschan mintga di sur il cunfin cun l'Italia u en il chantun Tessin. Per quests territoris èsi pia anc adina da grond interess da tegnair avert ils cunfins.
Da l'autra vart expriman ils territoris menziunads lur giavisch da prender mesiras efficazias per ralentar l'ulteriura derasaziun dal coronavirus. Uschia han deputadas e deputads da la regiun Moesa pretendì en ina brev a la Regenza ch'il chantun serria ils plazzals en lur regiun. Els han tema che las mesiras ordinadas da la Confederaziun na sa laschian betg realisar sin plazzals.
La Regenza ha chapientscha per ils basegns da las valladas al sid dal chantun. Il cumenzament da l'emna vegnan perquai ils cussegliers guvernativs Peter Peyer, schef dal Departament da giustia, segirezza e sanadad, e Marcus Caduff, schef dal Departament d'economia publica e fatgs socials, ensemen cun Martin Bühler, schef dal Stab directiv chantunal, a salvar discurs cun represchentantas e represchentants da las regiuns menziunadas.
La Regenza refusa la pretensiun da serrar tut ils plazzals en la regiun Moesa. En quest reguard èn las prescripziuns da la Confederaziun, che valan actualmain, cleras: Ellas scumondan al chantun da prender ina tala mesira. Quai han confermà anc ina giada consultaziuns cun il cusseglier federal Alain Berset. Il chantun sustegna la tenuta da la Confederaziun che regulaziuns naziunalas sajan las meglras schanzas per impedir la derasaziun dal coronavirus. Cuminaivlamain cun il chantun Tessin e cun la Confederaziun è la Regenza persvadida che plazzals, sin ils quals i na po betg vegnir garantì che las prescripziuns severas vegnian observadas, stoppian vegnir serrads.
La Regenza appellescha la branscha da construcziun sco er tut las autras branschas d'observar strictamain las mesiras da la Confederaziun per proteger las lavurantas ed ils lavurants e per limitar il privel da s'infectar a la plazza da lavur e sin il viadi a la lavur. Igl è en l'interess da mintga interpresa da pudair pratitgar sia activitad uschè ditg sco pussaivel. Ma quai è mo pussaivel, sch'ella observa consequentamain las prescripziuns.
Gremi: Regenza
Funtauna: rg Chanzlia chantunala