Cuntegn da la pagina

La Regenza ha preparà in pachet per mitigiar las consequenzas economicas da la crisa da corona

  • Erste Mitteilung
  • Neuen Beitrag einfügen

Las interpresas pertutgadas finanzialmain da la crisa da corona duain pudair segirar per gronda part las plazzas da lavur e las entradas. Perquai sustegna la Regenza l'economia grischuna supplementarmain cun 80 milliuns francs, ed ella ha preparà in pachet cun differentas mesiras d'accumpagnament.

Il dretg d'urgenza dal Cussegl federal e las mesiras decretadas sin basa da tal per franar la pandemia da corona tutgan bleras interpresas sco er persunas cun activitad da gudogn independenta ed èn ina smanatscha per lur existenza. Pli ditg che questa situaziun extraordinaria dura, e pli fitg che la liquiditad dals manaschis pertutgads e las plazzas da lavur èn periclitadas. Per mitigiar questas consequenzas economicas rigurusas ha la Confederaziun deliberà l'emna passada gia in vast pachet da mesiras da passa 40 milliardas francs.

Las consequenzas economicas da la pandemia da corona vegnan ad esser spezialmain grondas en il chantun Grischun cun ses ferm sectur da turissem. Pervia da quai na vegn l'agid da la Confederaziun strusch a bastar per tut las parts pertutgadas. Per serrar questa largia ha la Regenza grischuna preparà in pachet da mesiras supplementaras. Cun las prestaziuns supplementaras chantunalas dad 80 milliuns francs na duain betg vegnir schliads problems structurals existents, mabain duain en emprima lingia vegnir sustegnidas interpresas solventas che han difficultads da liquiditad e tar las qualas ils instruments da la Confederaziun na gidan betg u gidan memia pauc. Ensemen cun ils meds finanzials deliberads da la Confederaziun stattan uschia a disposiziun a l'economia dal Grischun circa ina mesa milliarda francs sco agid da liquiditad.

En spezial èn vegnidas concludidas las suandantas mesiras:

Credit d'impegn general dad 80 milliuns francs per garanzias solidaricas chantunalas
Il chantun ha deliberà – en cumplettaziun e subsidiarmain a la Confederaziun – garanzias chantunalas en la dimensiun dad 80 milliuns francs. Questa garanzia solidarica è limitada a maximalmain 15 pertschient dal retgav da la svieuta ed a 5 milliuns francs per interpresa. Il chantun surpiglia ina garanzia da perdita da 100 pertschient, premess che las pussaivladads da credit garantidas da la Confederaziun sajan exauridas cumplettamain, ch'il basegn supplementar da liquiditad saja cumprovà e che la banca haja examinà la dumonda da credit.

Culanza tar termins da pajament e renunzia a tschains da retard ed a taxas d'admoniziun
Fin la fin da l'onn 2020 vegni renunzià d'incassar tschains da retard e taxas d'admoniziun per quints dal chantun sco taglias, taxas e multas. Pervia d'in conclus dal Cussegl federal èn las scussiuns interruttas fin ils 19 da avrigl 2020.

La pussaivladad da prolungar il termin da pajament per quints dal chantun che n'èn anc betg pajads u da permetter in pajament en ratas vegn applitgada da l'administraziun chantunala en moda generusa per interpresas e per persunas che na pon actualmain betg pajar lur quints en consequenza da la pandemia da corona.

Per augmentar la liquiditad dals purschiders da prestaziuns e dals furniturs dal chantun, vegnan tut ils quints entrads controllads directamain da l'administraziun chantunala e pajads uschè svelt sco pussaivel, suenter ch'els èn vegnids approvads internamain. La Regenza appellescha a tut las vischnancas ed a tut ils instituts da dretg public sco er a tut ils manaschis organisads tenor dretg privat dal chantun, da far sche pussaivel il medem sco el.

Culanza en connex cun modalitads da restituziun per emprests dal chantun e da la NPR
Il chantun è culant en connex cun modalitads da restituziun per emprests dal chantun e da la Confederaziun ch'èn vegnids deliberads sa basond sin la Lescha davart il svilup economic u sin la nova politica regiunala da la Confederaziun (NPR). Il chantun è pront d'examinar en il cas singul soluziuns cun ils emprestants pertutgads concernent ils pajaments d'amortisaziun.

Sustegn per la cultura e per il sport
Er per il chantun èsi impurtant d'impedir che la cuntrada grischuna da sport e da cultura vegnia donnegiada duraivlamain. Per la cuntrada da cultura svizra metta la Confederaziun a disposiziun tut en tut 280 milliuns francs sco emprima transcha per 2 mais. Latiers tutgan indemnisaziuns per perditas dal retgav pervia d'annullaziuns d'occurrenzas u da projects resp. pervia da serradas da manaschis. L'indemnisaziun da questas perditas cuvra maximalmain 80 pertschient dal donn finanzial. La mesadad dals custs vegn surpigliada dal chantun. Ils meds finanzials necessaris vegnan mess a disposiziun, cur che las directivas respectivas per realisar il pachet da mesiras da la Confederaziun èn avant maun. Plinavant desista il chantun da princip da reducziuns tar contribuziuns periodicas respectivamain tar cunvegnas da prestaziun en il sectur da la cultura.

Per il sport svizzer metta la Confederaziun a disposiziun 100 milliuns francs. Sco cumplettaziun da las mesiras federalas ha il chantun l'intenziun da sustegnair finanzialmain las uniuns da sport per mantegnair en il chantun Grischun las structuras da sport che han ina funcziun impurtanta d'utilitad publica e che sa basan principalmain sin lavur en uffizi d'onur.

E finalmain sa mussa il chantun culant en il sectur da la cultura e dal sport en cas d'occurrenzas promovidas dal chantun che han stuì vegnir annulladas u spustadas, e vegn a chattar ina soluziun uschè bainvulenta sco pussaivel en il cas singul.

Tractar en moda prioritara las surdadas da lavurs dal chantun
Las proceduras da surdada vegnan cuntinuadas e liquidadas sche pussaivel senza retardaments. Grazia al mantegniment da l'activitad da surdada tras il chantun pon las interpresas stgaffir reservas d'incumbensas e planisar en moda pli lianta l'andament dals affars. Las difficultads en las proceduras che sa mussan vegnan – dapertut nua che quai è pussaivel – schliadas en moda pragmatica (p.ex. pussaivladads da sa participar a las averturas da las offertas per videotelefonia).

Dialog constructiv cun federaziuns economicas e cun represchentanzas dals lavurants
Igl è ina gronda finamira da la Regenza grischuna da cuntinuar er en questa situaziun extraordinaria cun il barat cun las represchentanzas da las federaziuns economicas e dals lavurants che vegn tgirà dapi blers onns. Uschia èn il president da la Regenza Christian Rathgeb ed il cusseglier guvernativ Marcus Caduff sa scuntrads l'emna passada cun ils presidents da differentas federaziuns economicas dal Grischun per tractar la situaziun. In dialog constructiv ha cusseglier guvernativ Caduff er pudì manar cun represchentanzas dals lavurants. I sa mussa che las mesiras che la Confederaziun ed ils chantuns han prendì fin ussa chattan in vast consentiment.

Ulteriuras infurmaziuns: www.gr.ch/coronavirus


Agiunta:

Conferenza da medias
Ordinaziun davart il pachet da corona dal chantun Grischun


Infurmaziuns:
cusseglier guvernativ Marcus Caduff, schef dal departament d'economia publica e fatgs socials, tel. 081 257 23 01, e-mail Marcus.Caduff@dvs.gr.ch


Gremium: Regierung
Quelle: dt Standeskanzlei

Neuer Artikel