Navigation

Inhaltsbereich

  • Erste Mitteilung
  • Neuen Beitrag einfügen

Ier saira èn s'inscuntradas a Bellinzona las delegaziuns da las Regenzas dal chantun Grischun, represchentà tras il president da la Regenza Christian Rathgeb e tras il cusseglier guvernativ Peter Peyer, sco er dal chantun Tessin, represchentà tras il president da la Regenza Christian Vitta e tras ils cussegliers guvernativs Raffaele de Rosa e Norman Gobbi, per discutar la coordinaziun en il cumbat cunter il coronavirus. En il rom da l'inscunter, al qual er il cusseglier federal Ignazio Cassis è stà preschent, han las duas Regenzas garantì il sustegn vicendaivel. En cas da basegn gidan ils dus chantuns in l'auter cun persunal spezialisà e cun letgs intensivs. Plinavant appelleschan ils dus chantuns a las possessuras ed als possessurs d'abitaziuns secundaras sco er a las turistas ed als turists da restrenscher lur mobilitad per betg engrevgiar supplementarmain las infrastructuras da sanadad en il Tessin ed en il Grischun. 

Ils chantuns Tessin e Grischun, en spezial las vals grischunas dal sid, èn pertutgads spezialmain da la pandemia actuala da corona. Las cuminaivladads e la vischinanza geografica han l'effect ch'ils dus chantuns pon sustegnair e gidar in l'auter en cas da basegn en il cumbat cunter la pandemia. La scuntrada ha gì l'intent da barattar experientschas e da tractar pli detagliadamain intginas dumondas d'in interess cuminaivel en connex cun il coronavirus.

Sustegn en il sectur dal provediment da la sanadad
Actualmain èn tuts dus chantuns abels da garantir en moda independenta il provediment da la sanadad per l'atgna populaziun. Ils represchentants dals dus chantuns han empermess da sustegnair in l'auter en cas ch'i dess stretgas, e quai cun metter a disposiziun persunal spezialisà. En l'avegnir duain er dischlocaziuns da pazientas e pazients esser pussaivlas tranter ils dus chantuns.

Barat professiunal dals stabs directivs e dals medis chantunals
En il rom da l'inscunter ha er gì lieu in barat professiunal tranter ils manaders dals Stabs directivs chantunals e tranter ils medis chantunals. Els surveglian d'in cuntin la situaziun en ils dus chantuns.

Situaziun en il Mesauc
A chaschun da l'inscunter èn vegnidas discutadas er intginas dumondas concernent il Mesauc sco regiun da cunfin cun il chantun Tessin. Las duas Regenzas vegnan a tgirar er vinavant in stretg contact e vegnan ad examinar ed a survegliar vinavant la situaziun ils proxims dis.

Appel cuminaivel a las possessuras ed als possessurs d'abitaziuns secundaras – restai a chasa!
Las Regenzas dals dus chantuns rinforzan l'appel a las possessuras ed als possessurs d'abitaziuns secundaras sco er a las turistas ed als turists da restrenscher lur mobilitad ad in minimum e da desister uschenavant sco pussaivel – en spezial sur Pasca – da retrair lur abitaziuns da vacanzas.

Engraziament a las persunas spezialisadas involvidas
La situaziun actuala vegn anc a durar in temp ed esser ina gronda sfida per numerusas persunas spezialisadas da differents secturs. Las duas Regenzas engrazian a tut las persunas ch'èn actualmain en acziun per gidar e per sustegnair la populaziun. In engraziament spezial va a l'entir persunal da sanadad per la lavur immensa e per l'engaschament enorm ch'el presta durant questa situaziun difficila.

Observar vinavant strictamain las reglas da cumportament
Las Regenzas dal chantun Grischun e dal chantun Tessin appelleschan danovamain a la populaziun grischuna e tessinaisa, en spezial er a las gruppas periclitadas pli fitg, d'observar strictamain tut las ordinaziuns da las autoritads. Quai vul dir: observar las mesiras d'igiena, tegnair distanza e restar sche pussaivel a chasa.

Ulteriuras infurmaziuns davart la situaziun en il Grischun ed en il Tessin èn disponiblas sin las paginas d'internet www.gr.ch/coronavirus e www.ti.ch/coronavirus.

Fotografias:

-

-

 Infurmaziuns

Per ulteriuras infurmaziuns per mauns da la populaziun renviescha il chantun Grischun a la suandanta pagina d'internet: www.gr.ch/coronavirus

Per dumondas generalas per telefon stat a disposiziun a la populaziun da lingua tudestga la lingia d'infurmaziun da l'Uffizi federal da sanadad publica:
Telefon: +41 58 463 00 00 (mintga di, di e notg)


Infurmaziuns per las collavuraturas ed ils collavuraturs da las medias, per il sectur da sanadad, per las vischnancas e per las scolas
Dumondas pon vegnir drizzadas er vinavant directamain al post da communicaziun per il coronavirus:

-

Uras da manaschi mail: glindesdi fin dumengia 08.00 – 17.00
Uras da manaschi telefon: glindesdi fin venderdi 08.00 – 19.00

E-mail medias: kfsmedien@amz.gr.ch  
E-mail sectur da sanadad: kfsmedical@amz.gr.ch  
E-mail vischnancas, scolas & lavur: kfsinfo@amz.gr.ch  
Telefon: +41 81 254 16 00


President da la Regenza dal chantun Tessin Christian Vitta, schef dal Departament da finanzas ed economia, tel. +41 91 814 44 60, e-mail dfe-dir@ti.ch


Gremi: Regenza
Funtauna: rg Chanzlia chantunala

Neuer Artikel