Navigaziun principala

Cuntegn da la pagina

Il cusseglier guvernativ Jon Domenic Parolini ha visità ensemen cun il president dal Cussegl grond dal chantun Grischun Alessandro della Vedova las scolas a Roveredo

  • Erste Mitteilung
  • Neuen Beitrag einfügen

Ils 14 da mars 2020, pia il di suenter la serrada da las scolas, ha l'Inspecturat da scola stabilì ina colliaziun directa tar las direcziuns da scola en tut las linguas chantunalas. En stretga collavuraziun cun il Departament d'educaziun, cultura e protecziun da l'ambient han pudì vegnir scleridas numerusas dumondas concernent il manaschi da scola. Questa collavuraziun ch'exista vinavant rinforza las scolas er cun sguard sin il futur.

L'instrucziun a distanza è previsa en duas furmas: en furma analoga ed en furma digitala.
Er en l'instrucziun a distanza resta la persuna d'instrucziun ina persuna da referiment impurtanta ch'è en cas da motivar las scolaras ed ils scolars. Ina instrucziun a distanza concepida en moda optimala distgargia las famiglias e po gidar a dar ina structura al mintgadi. In contact regular cun las famiglias e cun ils geniturs è in sustegn er per scolaras e scolars cun difficultads d'emprender u per talas e tals ch'èn dischavantagiads pervia da lur situaziun famigliara.

Finamira da la visita
La finamira è stada quella da vesair persunalmain, co che l'instrucziun a distanza, ch'è vegnida elavurada en las duas emprimas emnas e che vegn realisada dapi il glindesdi passà, funcziuna. La visita ha er dà l'occasiun da mussar solidaritad envers ils fatgs da scola. Roveredo stat oz simbolicamain per las set realitads linguisticas e socialas en noss chantun.

Instrucziun a distanza
Durant l'emprima emna suenter la serrada èn las scolas sa preparadas intensivamain per l'instrucziun a distanza. En il decurs da la segunda emna èn vegnids fatgs tests sin divers nivels. Quels tanschevan da la communicaziun fin a la funcziunalitad dals programs duvrads, en spezial per il stgalim secundar I.
Il glindesdi han tut las scolaras e tut ils scolars dal chantun Grischun survegnì in program da lur persunas d'instrucziun cun cleras lezias e clers pensums sco er cun materialias utilas, per che l'instrucziun a distanza haja pudì cumenzar.

L'instrucziun a distanza è previsa per tut las classas, pia da la scolina fin a la 9. classa. En las classas bassas vegnan preferidas soluziuns analogas, a partir da la 5. classa duai l'instrucziun a distanza però vegnir realisada cun agid d'apparats digitals.
Las scolas vegnan supplitgadas da garantir ina instrucziun a distanza pragmatica e prudenta che tegna quint da la situaziun.

Visita a Roveredo
Per cumenzar è ina visita da la scolina "La Cioldina" stada sin il program. En preschientscha dals represchentants dal chantun èn ils uffants vegnids cun lur geniturs in suenter l'auter a la scolina per prender materialias sco er lezias e pensums. La mussadra ha declerà, co che l'instrucziun a distanza funcziuna sin quest stgalim ed ha raquintà da las emprimas experientschas cun tala.

Alura è stada previsa ina scuntrada cun las persunas responsablas da la scola primara a Riva. Il mainascola e las persunas d'instrucziun han declerà als represchentants dal chantun, co che l'instrucziun a distanza sin quest stgalim è planisada e co ch'ils apparats digitals vegnan introducids en l'instrucziun a partir da la 5. classa.

Ils represchentants dal chantun èn arrivads ad ura en la scola dal stgalim secundar I "ai Mondan" per assister directamain ad in chat da classa ch'il magister da classa aveva organisà per furnir a las scolaras ed als scolars da dalunsch ulteriuras explicaziuns e detagls.

Roveredo è oz in exempel concret per la concepziun pratica da l'instrucziun a distanza. Ma er tut las autras scolas en il chantun han chattà ina soluziun adequata a la situaziun.

Fotografia agiuntada:

-
Sin la fotografia da dretga a sanestra: Manuel Atanes, mainascola, Arno Zanetti, inspectur da scola, dr. Jon Domenic Parolini, cusseglier guvernativ, e Alessandro Della Vedova, president dal Cussegl grond


Persunas da contact:

- cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 12, e-mail Jondomenic.Parolini@ekud.gr.ch
- Arno Zanetti, inspectur da scola responsabel per il district V, tel. +41 81 257 65 56, e-mail Arno.Zanetti@avs.gr.ch


Gremi: Departament d'educaziun, cultura e protecziun da l'ambient
Funtauna: rg Departament d'educaziun, cultura e protecziun da l'ambient

Neuer Artikel