Cuntegn da la pagina

 Crisa da corona: discurs tranter la Lumbardia ed il Grischun

  • Erste Mitteilung
  • Neuen Beitrag einfügen

Il president da la Regenza Christian Rathgeb ha manà oz cun Massimo Sertori, commember da la Regenza (assessur) da la regiun Lumbardia per corporaziuns da dretg public, territoris da muntogna e relaziuns cun la Confederaziun, discurs davart il cumbat cunter la crisa da corona. En quest connex èn er vegnidas tractadas mesiras cunter la derasaziun dal virus.

En la conferenza da video ha il president da la Regenza exprimì a Massimo Sertori la gronda consternaziun e la chapientscha da la Regenza per la situaziun difficila en l'Italia, en spezial en la Lumbardia. Ils dus commembers da las regenzas han alura discutà davart las mesiras prendidas dals dus pajais per cumbatter il coronavirus. Per las autoritads da tuttas duas varts dal cunfin ha la protecziun da la populaziun, en spezial però er da las lavurantas e dals lavurants, l'emprima prioritad en questa situaziun extraordinaria.

En il discurs è vegnida punctuada l'impurtanza da las cunfinarias e dals cunfinaris per las vals grischunas dal sid e per l'Italia. Il Puschlav, la Bregaglia e la Vuclina èn linguisticamain ed economicamain colliads stretgamain in cun l'auter. La protecziun da las lavurantas e dals lavurants e la segirada da las plazzas da lavur en las vals grischunas dal sid èn en l'interess da tuts. Ils partenaris da discurs èn sa cunvegnids d'intensivar anc ina giada las controllas da las mesiras d'igiena e da protecziun en las vals dal sid, en spezial cun il focus sin interpresas pli pitschnas. La Regenza appellescha a tut ils patruns d'observar rigurusamain las mesiras d'igiena e da protecziun, e quai betg mo durant la lavur, mabain er durant tut la structura dal di. En quest connex supplitgescha ella las federaziuns economicas da gidar a sensibilisar lur commembras e commembers. Plinavant examinescha il chantun da metter a disposiziun per cunfinarias e cunfinaris abitaziuns favuraivlas en la Bregaglia ed en il Puschlav. La mesiraziun da la temperatura da las cunfinarias e dals cunfinaris al cunfin, sco ch'ella vegn pretendida da la vart taliana, n'è betg pussaivla en Svizra per motivs giuridics.

Igl è vegnì rendì attent al fatg che la cumpetenza per mesiras da protecziun è chaussa da la Confederaziun dapi che la situaziun extraordinaria è vegnida proclamada il cumenzament da mars. Tant en Svizra sco er en l'Italia vegni controllà intensivamain che las mesiras d'igiena e da protecziun vegnian observadas en la publicitad ed en ils manaschis.

Tuttas duas varts han beneventà il barat constructiv ed han empermess da mantegnair vinavant il dialog.

Fotografia agiuntada:

-


Infurmaziuns:
president da la Regenza dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch


Gremi: Chanzlia chantunala 
Funtauna: rg Chanzlia chantunala

Neuer Artikel