Navigaziun principala

Cuntegn da la pagina

Nagina sessiun speziala dal Cussegl grond il matg 2020

  • Erste Mitteilung
  • Neuen Beitrag einfügen

A chaschun da sia sesida dals 20 d'avrigl 2020 ha la Conferenza da las presidentas e dals presidents dal Cussegl grond dal chantun Grischun decidì da betg salvar ina sessiun speziala il matg 2020.

Pervia da la situaziun actuala en il cumbat cunter la derasaziun dal coronavirus ha la Conferenza da las presidentas e dals presidents dal Cussegl grond prendì ils suandants conclus en connex cun la dumonda da salvar ina sessiun speziala davart il tema "coronavirus":

  • I vegn desistì da salvar ina sessiun speziala dal Cussegl grond il matg 2020 davart il tema spezial "coronavirus".
  • En la sessiun da zercladur 2020 – ch'è vegnida prolungada per dus dis e che ha lieu da glindesdi, ils 15-06, fin venderdi, ils 19-06 – vegnan in u dus dis ad esser reservads spezialmain per tractar il tema "coronavirus".
  • Per pudair observar las prescripziuns da distanza e d'igiena da la Confederaziun ha la sessiun da zercladur 2020 dal Cussegl grond lieu en la Halla da la citad da Cuira. Sche las prescripziuns da la Confederaziun vegnissan abolidas u schluccadas, avess la sessiun lieu sco usità en l'edifizi dal Cussegl grond.

Avant che prender ils conclus è vegnida manada ina discussiun intensiva. Ina minoritad da la PPS e da la PS è s'exprimida per ina sessiun speziala. Quai cun l'argument ch'i saja – en spezial er en temps da crisa – d'ina impurtanza centrala che tut las pussanzas statalas adempleschian lur funcziun. Il barat democratic parlamentar garanteschia che tut las vuschs vegnian udidas e che propostas differentas possian vegnir discutadas. La crisa da corona saja ina da las sfidas las pli grondas da l'istorgia pli nova dal chantun Grischun. I na dastgia betg ir a perder temp, fin ch'er la legislativa tractia substanzialmain il tema. Questas valitaziuns da la situaziun da partenza èn vegnidas sustegnidas da princip er dals adversaris d'ina sessiun speziala. Ils arguments principals cunter ina sessiun speziala il matg han dentant pertutgà il temp: Tenor il giudicament dals adversaris na saja betg avant maun avunda temp per preparar e per elavurar en moda adequata il tema cumplex "coronavirus". Tranter la sessiun speziala e la proxima sessiun ordinaria il zercladur sajan ultra da quai mo trais emnas. Per tuttina garantir ina integraziun commensurada dal Cussegl grond è vegnida fixada in'ulteriura sesida da la Conferenza da las presidentas e dals presidents che ha lieu ensemen cun la Regenza. Plinavant vegnan las cumissiuns ch'èn incaricadas cun la predeliberaziun a collavurar stretgamain cun ils departaments; ellas duain sa radunar uschè svelt sco pussaivel. Betg sco ultim han er ils custs supplementars che resultan d'ina sessiun speziala giugà ina rolla per la decisiun.

Infurmaziuns:
President dal Cussegl grond Alessandro Della Vedova, tel. +41 78 735 05 86

Gremi: Chanzlia chantunala
Funtauna: rg Chanzlia chantunala

Neuer Artikel