Las mesiras da protecziun d'enfin ussa fan effect. Perquai vala: betg ceder ussa, ed er vinavant tegnair distanza e lavar bain ils mauns. Tscherts manaschis dastgan avrir lur portas a partir da glindesdi. Ospitals e clinicas dastgan puspè far intervenziuns electivas sut tschertas cundiziuns. En mintga cas stoi dentant esser avant maun obligatoricamain in concept da protecziun.
Glindesdi proxim, ils 27 d'avrigl, cumenza l'emprima fasa d'ina leva schluccada. Per exempel a manaschis che porschan servetschs cun contact persunal u a martgads dal sectur da construcziun e dad iert vegni permess d'avrir lur portas. Quai adina sut la premissa ch'i saja avant maun in concept da protecziun.
La Regenza beneventa ch'il Cussegl federal vul returnar a partir da glindesdi proxim cun in emprim pass a la normalitad. Sche l'augment dal dumber da cas resta moderà, èn pussaivels proximamain ulteriurs pass da schluccada per l'economia ed eventualmain per il turissem grischun, uschenavant che la Confederaziun permetta quai. Per planisar la stagiun da stad èsi necessari tant per ils furniturs da prestaziuns dal turissem sco er per ils giasts ch'i vegnia numnà in spazi da temp pussaivel per avrir las purschidas turisticas. Quai procura per segirezza, permetta da concretisar las purschidas dals furniturs e pussibilitescha als giasts da planisar las vacanzas da stad.
Normalisaziun parziala en ospitals, clinicas e chasas da tgira
Ils ospitals e las clinicas che figureschan sin la glista d'ospitals dal Grischun dastgan puspè far intervenziuns ambulantas betg urgentas a partir dals 27 d'avrigl sut tschertas premissas. Per quest intent ston ils ospitals grischuns dentant elavurar in concept cuminaivel che garantescha tranter auter ch'i sajan avant maun da tut temp avunda letgs d'ospital per pazientas e pazients da COVID-19. Abstrahà da cas excepziunals n'èn visitas en ils ospitals er vinavant betg pussaivlas.
Visitas en chasas da persunas attempadas e da tgira sco er en instituziuns d'abitar per persunas creschidas cun impediments èn percunter pussaivlas sut tschertas circumstanzas ed observond las mesiras d'igiena. Responsabla per la decisiun è l'instituziun.
Dapli tests per persunas cun sintoms
Per cumprovar il virus pon da nov vegnir fatgs sfruschs dal nas e da la gula tar tut las persunas cun sintoms. Fin ussa eran quests tests reservads a las gruppas da ristga. Tgi che ha sintoms da malsogna sco fevra e tuss, mal la gula, difficultads da respirar, mal ils musculs u ina perdita da l'odurat e dal palat, duai isolar sasez e telefonar ad ina media u ad in medi.
Las mesiras da protecziun las pli efficazias cunter la derasaziun dal virus èn vinavant tegnair distanza e lavar bain ils mauns. Er en il rom da l'emprim pass da schluccada èsi impurtant d'observar questas mesiras sco er da respectar il scumond da gruppas cun dapli che 5 persunas. In nov augment dal dumber da cas periclitass er ils proxims pass da schluccada ed in'eventuala stagiun da stad turistica pussaivla.
Blers appartegnents voluntaris da la Protecziun civila en acziun
Dapi il cumenzament da la crisa han almain 514 persunas prestà en tut 4029 dis da servetsch da protecziun civila. 115 appartegnentas ed appartegnents da la Protecziun civila èn entrads voluntarmain en servetsch u han prolungà quel voluntarmain. Las appartegnentas ed ils appartegnents da la Protecziun civila èn stads engaschads cunzunt per la controlla d'access en ospitals ed en chasas da dimora, ma er per la furniziun da pasts. Actualmain èn engaschads 132 appartegnentas ed appartegnents da la Protecziun civila en differents secturs.
Infurmaziuns:
- cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e-mail Marcus.Caduff@dvs.gr.ch
- cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch
Gremi: Chanzlia chantunala
Funtauna: rg Chanzlia chantunala