Navigaziun principala

Cuntegn da la pagina

Crisa da corona: Calculaziun da las notas dals examens finals als gimnasis ed a las scolas medias spezialisadas dal Grischun

  • Erste Mitteilung
  • Neuen Beitrag einfügen

Ils 30 d'avrigl 2020 ha la Regenza decidì da realisar quest onn mo examens finals en scrit als gimnasis e sche pussaivel er a las scolas medias spezialisadas. Sa basond sin il conclus da la Conferenza svizra da las directuras e dals directurs chantunals da l'educaziun publica dals 5 da matg 2020 poi ussa vegnir renunzià definitivamain da far examens a bucca a las scolas medias spezialisadas. Pervia da quai pon ussa er vegnir rendidas enconuschentas las disposiziuns davart la calculaziun da las notas finalas dals gimnasis e da las scolas medias spezialisadas resguardond la situaziun da scolaziun speziala da l'onn da scola 2019/20.

Cun il conclus da la Regenza dals 30 d'avrigl 2020 èsi stà cler per ils gimnasis grischuns ch'i vegn a dar examens da maturitad mo en scrit. Pervia d'in conclus pendent da la Conferenza svizra da las directuras e dals directurs chantunals da l'educaziun publica (CDEP) n'hai percunter betg anc pudì vegnir decidì quel mument senza resalvas per las scolas medias spezialisadas, sche las scolaras ed ils scolars vegnan examinads mo en scrit u er a bucca als examens finals.

Decisiun da la CDEP per las scolas medias spezialisadas
Cun la decisiun da la CDEP dals 5 da matg 2020 è ussa avant maun la basa per pudair renunziar definitivamain als examens finals a bucca er a las scolas medias spezialisadas. Auter sa preschenta la situaziun en cas da la maturitad spezialisada en il champ professiunal "pedagogia". Qua ha la CDEP decidì ch'ils examens finals en il champ professiunal "pedagogia" stoppian vegnir manads tras en la procedura ordinaria cun resguardar las mesiras da protecziun recumandadas da la Confederaziun. Quai vala er per il curs preliminar da la Scola auta da pedagogia dal Grischun.

La valitaziun en la calculaziun da la nota finala vegn adattada
Per garantir che las scolaras ed ils scolars da las classas finalas dals gimnasis e da las scolas medias spezialisadas na vegnian betg dischavantagiads pervia da la renunzia als examens a bucca en la situaziun da scolaziun speziala actuala vegn adattada la valitaziun en la calculaziun da la nota finala. Per ils roms che vegnan examinads en scrit vegn resguardada la nota da l'attestat dal 2. semester dal rom respectiv per calcular la nota da l'examen final. La nota da l'examen final che importa 50 pertschient da la nota finala, resulta mintgamai per la mesadad da la nota da l'examen final en scrit e da la nota da l'attestat dal 2. semester da l'onn da scola current en il rom respectiv. Sco nota empirica ch'importa er 50 pertschient da la nota finala, vala la nota da l'attestat dal 1. semester da l'onn da scola current. Per la nota finala als gimnasis ed a las scolas medias spezialisadas vegn pia resguardada la nota dal 1. semester per 50 pertschient, la nota da l'attestat dal 2. semester per 25 pertschient e la nota da l'examen final en scrit per 25 pertschient. En ils roms senza examen final quintan las notas da l'attestat dal 1. semester per dus terzs e talas dals 2. semester per in terz per las notas finalas.

Infurmaziuns:
cusseglier guvernativ dr. Jon Domenic Parolini, schef dal departament d'educaziun, cultura e protecziun da l'ambient, tel. +41 81 257 27 01, e-mail Jondomenic.Parolini@ekud.gr.ch


Gremi: Departament d'educaziun, cultura e protecziun da l'ambient
Funtauna: rg Departament d'educaziun, cultura e protecziun da l'ambient

Neuer Artikel