Cuntegn da la pagina

Crisa da corona: Recumenzà cun il contact tracing en il chantun Grischun

  • Erste Mitteilung
  • Neuen Beitrag einfügen

In team da l'Uffizi da sanadad ha recumenzà ils 11 da matg 2020 cun la lavur concernent il contact tracing. Quai cun il sustegn da persunal medicinal spezialisà e d'appartegnents da la Protecziun civila. La finamira è quella d'interrumper las chadainas d'infecziun, tras quai che las persunas malsaunas e lur persunas da contact vegnan registradas e messas en isolaziun (persunas malsaunas) resp. en quarantina (persunas da contact). Il care team COVID da l'Uffizi da sanadad dal Grischun accumpogna durant quest temp las persunas pertutgadas.

Per tegnair sut controlla la derasaziun dal virus vegnan persunas cun sintoms da COVID-19 testadas tenor las prescripziuns da la Confederaziun. Sch'il test è positiv, vegnan ellas isoladas, e lur persunas da contact vegnan messas en quarantina. Mintga singula infecziun nova vegn repersequitada e las persunas da contact vegnan eruidas. Questa incumbensa vegn ademplida dal care team COVID. Quest team, che stat sut la direcziun da l'Uffizi da sanadad, sa cumpona actualmain da sis persunas e po vegnir engrondì en cas da basegn.

Las persunas malsaunas en isolaziun e las persunas da contact en quarantina vegnan contactadas mintga di (cun excepziun da las fins d'emna) per telefon tras il care team COVID da l'Uffizi da sanadad dal Grischun ubain tras las medias u ils medis da chasa. A las persunas da contact vegnan tschentadas dumondas davart lur stadi da sanadad per identifitgar uschè baud sco pussaivel cas d'infecziun. Plinavant pon vegnir eruids ils basegns da provediment da las persunas en isolaziun ed en quarantina (procuraziun da bains dal diever quotidian, da medicaments e.u.v.).

Per tgirar en moda effizienta las pazientas ed ils pazients sco er lur persunas da contact è vegnida sviluppada ina software specifica. Quella vegn testada dapi ils 11 da matg ed implementada il glindesdi proxim. L'applicaziun ademplescha las grondas pretensiuns da la protecziun da datas ed ha in aut nivel da segirezza tecnica. Per sviluppar la plattafurma vegnan investids 50 000 francs. Plinavant vegni quintà cun custs currents da circa 6000 francs per mais per il manaschi.

Sco alternativa a la tgira telefonica pon las pazientas ed ils pazients ch'èn infectads cun COVID-19 sco er las persunas da contact sa decider per ina soluziun dad app, l'uschenumnada "COVID Care App Grischun". Cun agid d'ina communicaziun push consultescha l'app mintga di las datas da sanadad da las persunas pertutgadas ed annunzia questas datas a l'Uffizi da sanadad dal Grischun. L'app n'ha nagina funcziun da tracking. Ella è unicamain in med da communicaziun pli simpel e pli modern tranter las persunas da tgira e las persunas malsaunas.

La Confederaziun porscha in'app cumplementara
Sco cumplettaziun dal contact tracing convenziunal da l'Uffizi da sanadad dal Grischun porscha la Confederaziun a la populaziun l'app Swiss PT (PT signifitga proximity tracing). Questa app eruescha, sche dus smartphones èn durant dapli che 15 minutas pli datiers che 2 meters in da l'auter. Lura barattan ils apparats in cun l'auter sur Bluetooth ina infurmaziun codada, in'uschenumnada summa da controlla. Sch'ina persuna che ha installà l'app sin ses smartphone survegn x insacura COVID-19, po ella – suenter che l'Uffizi da sanadad ha verifitgà la diagnosa – endatar sin sia app ch'ella saja ussa malsauna. Als smartphones che han ademplì avant ils criteris da contact vegn lura tramess in messadi.

L'app Swiss PT po vegnir duvrada voluntarmain ed è gratuita. La sfera privata resta garantida: Las summas da controlla na cuntegnan naginas infurmaziuns davart la persuna che utilisescha l'app, davart il lieu u davart l'apparat duvrà. L'app serva unicamain a franar la derasaziun dal nov coronavirus. I na vegnan rimnadas naginas datas persunalas u datas da moviment davart las persunas che utiliseschan l'app. Ultra da quai na vegnan arcunadas en moda centrala naginas datas concernent ils contacts descrits.

Avant ch'il rollout da l'app ha lieu il zercladur 2020 sin plaun naziunal, fa l'Uffizi federal da sanadad publica tests cun tala en il rom d'ina fasa da pilot cun in circul d'utilisadras e d'utilisaders limità. Il Grischun è sa mess a disposiziun sco chantun da test.

Infurmaziuns:
Rudolf Leuthold, manader da l'Uffizi da sanadad, tel. +41 81 257 26 41, e-mail Rudolf.Leuthold@san.gr.ch


Gremi: Uffizi da sanadad
Funtauna: rg Uffizi da sanadad

Neuer Artikel