Cuntegn da la pagina

Emplantaziuns da test cun spezias da bostgs cun vistas per il futur

  • Erste Mitteilung
  • Neuen Beitrag einfügen

La midada dal clima chaschuna grondas sfidas per la selvicultura, perquai che las cundiziuns localas vegnan a sa midar fermamain en il decurs dals proxims decennis. Tge spezias da bostgs che pon ademplir duraivlamain las funcziuns dal guaud en tge lieus er sut cundiziuns midadas, vegn perscrutà durant ils proxims 30 onns en collavuraziun cun l'Institut federal per la perscrutaziun da guaud, naiv e cuntrada WSL e cun l'Uffizi federal d'ambient UFAM er en il Grischun.

Ils proxims onns vegnan emplantads plirs milli bostgs giuvens, e lur creschientscha vegn observada ed examinada permanentamain dal WSL. En vista a la midada dal clima pon ils resultats uschia vegnir integrads en las recumandaziuns da spezias da bostgs. Ils custs stimads da 300 000 francs per ils emprims tschintg onns cuntegnan lavurs preparativas, la construcziun da saivs da protecziun cunter la selvaschina sco er in mantegniment regular. Els vegnan surpigliads cumplainamain da la Confederaziun e dal chantun. Ils bostgs giuvens vegnan mess a disposiziun dal WSL.

Differentas abilitads grazia a la selecziun genetica
Bostgs giuvens creschan suenter oz en ils guauds per gronda part en moda natirala tras l'uschenumnada regiuvinaziun natirala. Sur periodas da plirs tschientaners ha lieu en questa moda ina selecziun genetica, perquai ch'i prospereschan adina mo quels individis ch'èn adattads il meglier a las cundiziuns da l'ambient vertentas. Quai è er il motiv che differents bostgs da la medema spezia han dal tuttafatg differentas abilitads. In exempel: In ruver puschlà da la Tirchia dal nord cumporta ina stad sitga e chauda cun bler main problems ch'in ruver puschlà da la Val dal Rain grischuna ch'era disà da survegnir adina avunda aua durant ils mais da stad durant sia vita.

Neuer Artikel

 

Emplantaziuns da test per perscrutar il cumportament da creschientscha
Entant che las cundiziuns localas per ils bostgs dal guaud sa midan mo marginalmain en tschertas regiuns, sa mussan en autras regiuns – pervia da las midadas da las temperaturas e da las precipitaziuns – midadas radicalas en la cumposiziun da las spezias da bostgs. Oz san ins bain bler davart la derasaziun da las spezias da bostgs indigenas, ma pauc davart lur toleranza envers midadas climaticas sveltas. I sa mussa che bleras spezias da bostgs na pon betg pli popular lur territori da derasaziun actual, ma pon percunter occupar novs territoris. Ma i na ston betg adina esser autras spezias da bostgs, perquai che er nossas spezias da bostgs indigenas han in grond potenzial da s'adattar. Nua che quest potenzial è ì a perder durant ils ultims tschientaners, pudess quai vegnir gulivà cun emplantaziuns cumplementaras da questas spezias cun bostgs d'autras regiuns da l'Europa.

Perquai ch'igl è enconuschent anc memia pauc en chaussa, vegnan fatgas – en il rom d'in project naziunal – durant ils onns 2020 fin 2022 tut en tut 57 emplantaziuns da test, en las qualas vegnan emplantadas 18 differentas spezias da bostgs per perscrutar, co ch'ellas creschan en lieus oz per part anc betg colonisads. En quest connex vegnan emplantadas tant spezias da bostgs indigenas (13 spezias) sco er spezias da bostgs ospitantas (5 spezias). En il chantun Grischun vegnan endrizzadas e survegliadas otg surfatschas. Quellas èn vegnidas tschernidas or da 20 surfatschas proponidas dals selviculturs da revier e sa chattan en las vischnancas Alvra (Tgavrouls), Bravuogn Filisur (God dla Spena), Bregaglia (Dre Mota), Maiavilla (Fuchsenwinkel), Samedan (Plaun God), Val Müstair (Calcuoir), Valsot (Vadrain) e Val Stussavgia (Brand Gampel).

Ulteriuras infurmaziuns dal WSL vegnan mussadas sin la pagina d'internet dal project.


Fotografias agiuntadas:

-
La surfatscha da Vaia che sa chatta sur Bravuogn sin var 1850 m s.m. era vegnida donnegiada dal stemprà ed è vegnida rumida. Ella è adattada optimalmain per in'emplantaziun da test. La gronda saiv cunter la selvaschina è gia vegnida preparada, las emplantaziuns vegnan fatgas a partir da l'atun 2020.

-
Singulas emplantaziuns èn gia vegnidas fatgas per emprova. Qua ina gruppa d'ischis da muntogna giuvens.

 


Infurmaziuns: 
- Urban Maissen, selvicultur chantunal, Uffizi da guaud e privels da la natira, tel. +41 81 257 62 80, e-mail Urban.Maissen@awn.gr.ch
- dr. Marco Vanoni, manader dal sectur Guaud da protecziun ed ecologia forestala, Uffizi da guaud e privels da la natira, tel. +41 81 257 38 57, e-mail Marco.Vanoni@awn.gr.ch


Gremi: Uffizi da guaud e privels da la natira
Funtauna: rg Uffizi da guaud e privels da la natira