Navigaziun principala

Cuntegn da la pagina

Coronavirus: i vegn recumandà da purtar mascrinas

  • Erste Mitteilung
  • Neuen Beitrag einfügen

En vista al svilup dal dumber da cas avertescha l'Uffizi da sanadad dal Grischun d'ulteriuras mesiras rigurusas. Las ultimas emnas han mussà quant svelt ch'in augment exponenzial dal dumber da cas po succeder. Actualmain sa chattan en il Grischun 10 persunas en isolaziun, 14 persunas en quarantina ed ina persuna vegnan tgiradas en ils ospitals.

Il dumber da persunas ch'èn s'infectadas da nov cun il coronavirus crescha tendenzialmain. Glindesdi, ils 20 da fanadur 2020, sa chattavan en il Grischun 10 persunas en isolaziun, 14 persunas en quarantina ed ina persunas vegnivan tgiradas en ils ospitals. Sco che l'Uffizi da sanadad infurmescha, è la situaziun però stabila, in ulteriur augment fiss dentant critic.

La finamira è quella d'evitar sche pussaivel ulteriuras mesiras rigurusas. L'Uffizi da sanadad appellescha tant a la populaziun sco er als manaschis d'observar las prescripziuns. Mo sche la regla da distanza dad 1,5 meters, las mesiras generalas d'igiena e l'obligaziun da purtar mascrinas da protecziun en il traffic public vegnan observadas strictamain e mo sche interpresas sco er instituziuns fan valair consequentamain lur concepts da protecziun, po il nov coronavirus vegnir franà e poi vegnir desistì da prender ulteriuras mesiras rigurusas.

Cun l'obligaziun da purtar mascrinas da protecziun en il traffic public èn vegnidas fatgas experientschas positivas fin ussa. L'Uffizi da sanadad recumonda ultra da quai da purtar ina mascrina adina, sche la distanza dad 1,5 meters na po betg vegnir observada e sch'i n'èn montadas naginas barrieras sco paraids da separaziun. Uschia serva il purtar ina mascrina en la publicitad en emprima lingia a la protecziun d'autras persunas. Ina persuna infectada po esser contagiusa – senza savair quai – gia 2 dis avant ch'ils sintoms sa mussan. Sche tut las persunas portan ina mascrina en cas da relaziuns da spazi stretgas, vegn mintga persuna protegida da las autras. Er sche mascrinas na garanteschan betg ina protecziun da 100 pertschient, retardeschan ellas massivamain la derasaziun dal nov coronavirus.

L'Uffizi da sanadad analisescha d'in cuntin la situaziun ed examinescha eventualas mesiras. Uschia èn vegnidas prendidas cuntinuadamain disposiziuns per interrumper las chadainas d'infecziun. Il contact tracing funcziuna vinavant e las resursas necessarias da persunal pon vegnir adattadas svelt al volumen effectiv.

Infurmaziuns:
Rudolf Leuthold, manader da l'Uffizi da sanadad, tel. +41 81 257 26 41, e-mail Rudolf.Leuthold@san.gr.ch 


Gremi: Uffizi da sanadad
Funtauna: rg Uffizi da sanadad

Neuer Artikel