Navigation

Inhaltsbereich

  • Erste Mitteilung
  • Neuen Beitrag einfügen

La Regenza ha deliberà il sboz d'ina revisiun parziala da la Lescha davart l'execuziun giudiziala per la consultaziun. En il sboz vegnan realisadas en spezial las midadas dal dretg federal e resguardads ils svilups en la pratica da l'execuziun giudiziala

La Regenza ha deliberà il sboz d'ina revisiun parziala da la Lescha davart l'execuziun giudiziala per la consultaziun. En il sboz vegnan realisadas en spezial las midadas dal dretg federal e resguardads ils svilups en la pratica da l'execuziun giudiziala.

La Lescha davart l'execuziun giudiziala è sa cumprovada da princip e na basegna nagina revisiun totala. Mo singulas disposiziuns ston vegnir adattadas per tegnair quint da las midadas dal dretg federal e dals svilups ch'èn capitads en il fratemp en la pratica da l'execuziun giudiziala dapi che la Lescha davart l'execuziun giudiziala è en vigur. Las midadas correspundentas pertutgan primarmain il transferiment d'incumbensas executivas a terzs externs, l'elavuraziun da datas da persunas e la protecziun giuridica.

Delegaziun d'incumbensas executivas
Per ademplir lur incumbensas executivas consulteschan las autoritads d'execuziun penala en differents secturs furniturs da prestaziuns uffizials sco er privats che n'èn betg ina part da l'administraziun centrala. La dimensiun da questas furmas da cooperaziun tanscha da la concepziun d'in contract singul fin a cooperaziuns a lunga vista cun furniturs da prestaziun chantunals decentrals sco ils Servetschs psichiatrics dal Grischun. Ultra da questas furmas tradiziunalas da la collavuraziun sa mussi ch'ils chantuns vegnan a cooperar pli fitg en il futur en il sectur da l'execuziun da chastis e da mesiras, e quai cun fundar in'uniun, da la quala els retiran prestaziuns dal dretg d'execuziun. Cun in sguard sin quest svilup e sin l'impurtanza vinavant gronda da furniturs externs pari inditgà da reglar meglier questas furmas da cooperaziun en la Lescha davart l'execuziun giudiziala. 

Ils documents da consultaziun stattan ussa a disposiziun
La consultaziun dura dals 3 d'avust 2020 fin ils 3 da november 2020. Ils documents respectivs pon vegnir consultads sin las paginas d'internet dal chantun u dal Departament da giustia, segirezza e sanadad. Ultra da quai pon els vegnir empustads per telefon (+41 81 257 25 16) tar il departament.


Infurmaziuns
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch


Gremi: Regenza
Funtauna: rg Departament da giustia, segirezza e sanadad

Neuer Artikel