Navigaziun principala

Cuntegn da la pagina

Communicaziun da la Regenza dals 6 d'avust 2020

  • Erste Mitteilung
  • Neuen Beitrag einfügen
La Regenza ha incumbensà l'Institut svizzer da retschertgas davart allergias ed asma a Tavau d'installar e da manar in Center per proteomica. Ultra da quai ha ella approvà in project per ina tgira pli effizienta e pli segira dal guaud en la Val Bernina.

Rinforzar il Grischun sco lieu da perscrutaziun cun ina professura speziala en il sectur da las scienzas da la vita

La Regenza ha incumbensà l'Institut svizzer da retschertgas davart allergias ed asma a Tavau (ISRA Tavau) d'installar e da manar in Center per proteomica cun ina professura speziala per il champ da profil da la scienza da la vita ("life science"). Per la durada dal project dals onns 2020 fin 2026 stat a disposiziun per quest intent ina contribuziun totala da maximalmain var 3,49 milliuns francs. Resalvada resta l'approvaziun dal preventiv annual tras il Cussegl grond.
Cun il Center per proteomica che sto vegnir installà per la professura speziala al campus da medischina a Tavau duain vegnir sviluppadas vinavant las premissas metodicas e structuralas per la perscrutaziun d'emprima qualitad en il chantun Grischun en ils secturs allergologia/immunologia, medischina da precisiun, biomarcaders e medischina regenerativa. La proteomica da precisiun represchenta ina tecnologia centrala per la medischina persunalisada. Las metodas da perscrutaziun ch'èn previsas en il rom da la professura speziala dals instituts participads Clinica autalpina Tavau, Institut da perscrutaziun AO, ISRA Tavau ed Ospital chantunal dal Grischun duain gidar a chapir meglier las basas molecularas da tschertas malsognas a maun da la proteomica. Tras quai pon vegnir identifitgads biomarcaders e sviluppads sin basa da quels novas terapias persunalisadas. Il Center per proteomica permetta a las differentas instituziuns en il Grischun da realisar en il futur sin lur champ da perscrutaziun respectiv perscrutaziun d'emprima qualitad relevanta sin il medem nivel sco la cuminanza da perscrutaziun internaziunala. Uschia vegn augmentada l'impurtanza dal Grischun sco lieu da perscrutaziun. Grazia a la colliaziun instituziunala cun la facultad da medischina da l'Universitad da Turitg en furma d'ina professura d'assistenza po la collavuraziun che ha gia lieu tranter il ISRA e l'Universitad da Turitg vegnir rinforzada en il senn dal Program da la Regenza 2021‑2024.

Signet Regierungsprogramm

Tgira pli effizienta e pli segira dal guaud en la Val Bernina

La Regenza ha approvà il project "Adattaziun da l'avertura forestala Val Bernina" da la vischnanca da Puntraschigna. Uschia vegn pussibilitada ina tgira effizienta dals guauds da la vart sanestra da la Val Bernina tranter Puntraschigna e Morteratsch. A medem temp duain vegnir eliminadas en il rom dal project las difficultads actualas e las ristgas da segirezza che resultan en connex cun la cultivaziun dal guaud e cun il transport da laina.
Concretamain duai la via stretga existenta da Surovas fin Morteratsch vegnir amplifitgada sin ina lunghezza da circa 5,1 kilometers ad ina via da guaud adattada per camiuns. Medemamain duai la veglia punt sur la Ova da Bernina vegnir remplazzada tras ina nova punt da lain cun access a la via chantunala tar il lavuratori Seiler. Cun la renatiralisaziun d'ina via da 400 meters lunghezza, cun la construcziun d'in nov passadi da la viafier sur ils binaris da la Viafier retica e cun l'aboliziun dal passadi da la viafier nunsurveglià vegnan realisadas ulteriuras mesiras per tgirar il guaud en moda effizienta e segira. Il chantun sa participescha cun ina contribuziun da maximalmain var 2,6 milliuns francs als custs dal project.

Waldweg im Val Bernina mit Weggabelung

La Regenza ha approvà il project "Adattaziun da l'avertura forestala Val Bernina" da la vischnanca da Puntraschigna.

Dustanza per in torrent a Trin

La Regenza ha dà glisch verda per construir la dustanza Turnigla. La Turnigla è in aual da muntogna che traversa sin ses curs inferiur il territori d'abitadi da Trin Mulin. En il rom dal project da la vischnanca da Trin duai vegnir construida ina rampa da blocs da crap per segirar las punts, las cuvridas ed auters stabiliments d'infrastructura. Questa rampa da blocs da crap duai remplazzar la fortificaziun dal letg da l'aual existenta ch'è dentant per gronda part destruida en quest lieu. Als custs totals da var 420 000 francs sa participeschan il chantun e la Confederaziun cun contribuziuns per la correcziun dals curs d'aua. La contribuziun federala importa 147 000 francs e la contribuziun chantunala 84 000 francs.

Turniglabach mit angeschnittener Brücke

La Regenza ha dà glisch verda per construir la dustanza Turnigla. La Turnigla è in aual da muntogna che traversa sin ses curs inferiur il territori d'abitadi da Trin Mulin.

Contribuziun chantunala per la ARGO Fundaziun per l'integraziun da persunas cun impediments

Dapi l'onn 1998 dovra il lavuratori da la ARGO a Tavau in'abitaziun cun ina surfatscha utilisada da 97 meters quadrat sco biro. Il biro cumpiglia trais stanzas che vegnan occupadas da la direcziun dal lavuratori sco er da dus collavuraturs commerzials. Il locatur vertent ha ussa offrì a la fundaziun da cumprar questas stanzas. La Regenza ha garantì a la fundaziun ina contribuziun chantunala da maximalmain 388 000 francs als custs da cumpra da 485 000 francs. La ARGO Fundaziun per l'integraziun da persunas cun impediments en il Grischun maina dapi l'onn 1984 in lavuratori protegì a la Mattastrasse 7 a Tavau. Là porscha ella actualmain 64 plazzas da lavur a temp cumplain protegidas per persunas cun impediments. L'onn 2019 han 87 persunas cun impediments lavurà en ina plazza a temp parzial u a temp cumplain en ils secturs montascha, producziun, recicladi, inscripziun e lavandaria. La fundaziun ARGO porscha a Tavau ultra da quai plazzas d'abitar protegidas, plazzas da structuras dal di protegidas sco er in accumpagnament d'abitar.

Dapi l'onn 1998 dovra il lavuratori da la ARGO a Tavau in'abitaziun cun ina surfatscha utilisada da 97 meters quadrat sco biro.

Restauraziun voluminusa d'ina alp en l'Engiadina bassa

Avant passa 240 onns è vegnida construida sin l'Alp Tamangur Dadora en la Val S‑charl ina chascharia ch'è vegnida manada dapi lura d'ina gruppa collectiva da plirs purs. Durant l'alpegiada da 3 fin 4 mais vegniva engaschà persunal d'alp per elavurar il latg e per pertgirar il muvel. Curt suenter l'onn 1900 è l'Alp Tamangur Dadora vegnida bandunada. Dapi lura vegnan ils edifizis mo pli duvrads mintgatant sco susta ed èn en decadenza.
Ussa duai l'Alp Tamangur Dadora vegnir mantegnida sco part da la grondiusa cuntrada cultivada tras ina segirada e renovaziun miaivla da la substanza architectonica ch'è avant maun. Ella duai servir vinavant sco susta per l'Associaziun d'alp Praditschöl, per intents da scolaziun e per lavurs da gruppa (tgira da las pastgiras en collavuraziun cun la Fundaziun Pro Terra Engiadina e cun il Reservat da biosfera), per viandantas e viandants e per alpinistas ed alpinists. Per restaurar l'alp deliberescha la Regenza ina contribuziun chantunala da tut en tut var 248 000 francs als custs totals da var 836 600 francs.

altes Gebäude auf der Alp Tamangur Dadora altes Gebäude auf der Alp Tamangur Dadora

Avant passa 240 onns è vegnida construida sin l'Alp Tamangur Dadora en la Val S-charl ina chascharia ch'è vegnida manada dapi lura d'ina gruppa collectiva da plirs purs. 

Neuer Artikel
Gremi: Regenza
Funtauna: rg Chanzlia chantunala dal Grischun