La presidenta dal Cussegl naziunal Isabelle Moret ed il president dal Cussegl dals chantuns Hans Stöckli han visità ier suentermezdi ed oz il chantun Grischun. La delegaziun ha survegnì ina invista multifara da differentas interpresas grischunas che han da dumagnar sfidas spezialas durant la crisa da corona.
Gia ier aveva la Svizra la pli auta, la presidenta dal Cussegl naziunal Isabelle Moret, visità ensemen cun il president dal Cussegl dals chantuns Hans Stöckli il constructur da tecnica medicinala Hamilton Medical SA a Domat. Accumpagnads dal president dal Cussegl grond Alessandro Della Vedova han ils giasts da Berna survegnì tranter auter ina invista da la producziun d'apparats da respiraziun e da roboters da labor che vegnan exportads en tut il mund e che prestan ina contribuziun impurtanta al provediment da la sanadad en la crisa da corona. Pli tard è er vegnì vitiers cusseglier guvernativ Mario Cavigelli che ha accumpagnà ils giasts tar in guid en il chastè da Rehanau sco finiziun culturala da quel di.
Problems en connex cun la realisaziun da las mesiras da schluccada
Oz en damaun ha la delegaziun da la Confederaziun visità il Museum d'art dal Grischun. Suenter ha gì lieu in discurs cun il president da la Regenza Christian Rathgeb e cun il president dal Cussegl grond Alessandro Della Vedova en la Chasa grischa. En quest rom èn vegnidas explitgadas las sfidas actualas per dumagnar la crisa da corona e discutadas las problematicas specificas per il chantun Grischun per schluccar las mesiras da la Confederaziun.
Interprendidras creativas en la citad veglia da Cuira
Suenter ha la delegaziun visità differents negozis en la citad veglia da Cuira ed è sa barattada cun las possessuras da negozis davart las sfidas per dumagnar il lockdown chaschunà da la crisa da corona. La presidenta dal Cussegl naziunal ed il president dal Cussegl dals chantuns han pudì sa far in maletg al lieu davart ils differents projects e davart las diversas iniziativas da las possessuras da negozis.
Silsuenter èn ils giasts viagiads vinavant a Samedan. En l'Ospital da l'Engiadin'ota, nua ch'ils emprims cas da corona dal Grischun èn vegnids tractads, han els survegnì ina invista impurtanta en la situaziun speziala dal center da sanadad alpin.
Fotografias agiuntadas: