Navigaziun principala

Cuntegn da la pagina

Coronavirus: situaziun stabila grazia a mesiras efficazias

  • Erste Mitteilung
  • Neuen Beitrag einfügen

Il contact tracing sco er la controlla pli severa dals concepts da protecziun tras las vischnancas fan effect. Las chadainas d'infecziun han pudì vegnir franadas svelt, e cunter ulteriuras derasaziuns han pudì vegnir prendidas mesiras impurtantas. Sin basa da la situaziun epidemiologica cumenza la scola cun l'instrucziun da preschientscha regulara e senza obligaziun da purtar ina mascrina.

Las gestiunarias ed ils gestiunaris respectivamain las organisaturas ed ils organisaturs da stabiliments e da manaschis accessibels al public sco er d'occurrenzas ston anc adina elavurar e realisar concepts da protecziun suffizients. Ultra da quai ston ellas ed els verifitgar er vinavant la correctadad da las datas da contact registradas (num, prenum e numer da telefon), avant che laschar entrar u conceder l'access a las persunas, e tegnair en salv questas registraziuns en ina glista electronica structurada.

Ils concepts da protecziun vegnan controllads da las vischnancas
Vinavant èsi chaussa da las vischnancas da controllar e da far valair ils concepts da protecziun. Ellas annunzian al chantun mintga emna las controllas fatgas. Il monitoring da l'execuziun da las ultimas 2 emnas mussa da princip ch'ils concepts vegnan realisads bain tras las gestiunarias ed ils gestiunaris da stabiliments accessibels al public sco er tras las organisaturas ed ils organisaturs d'occurrenzas. Tar l'Uffizi da sanadad èn vegnidas registradas var 900 controllas durant las 2 emnas passadas. Mancanzas èn vegnidas constatadas principalmain tar la realisaziun da la regla da distanza.

Uffants, giuvenils e persunas d'instrucziun cun sintoms restan a chasa
Il nov onn da scola resp. d'emprendissadi cumenza en il chantun Grischun en tut las instituziuns da furmaziun en moda regulara cun l'instrucziun da preschientscha. Sin basa da la valitaziun da la situaziun actuala n'introducescha il chantun Grischun nagina obligaziun da purtar ina mascrina en las instituziuns da furmaziun per il cumenzament da scola. Las instituziuns da furmaziun pon dentant prescriver mesiras pli severas, p.ex. in'obligaziun da purtar ina mascrina en settings d'instrucziun, sche la situaziun epidemiologica pretenda quai u sche la distanza minimala na po betg vegnir observada. La cumpetenza e la responsabladad per introducir in'obligaziun da purtar ina mascrina ha la direcziun respectiva da l'instituziun da furmaziun.

En general vala: scolaras e scolars, persunas d'instrucziun sco er ulteriuras collavuraturas e collavuraturs da la scola restan a chasa, sch'ellas ed els han tuss, mal la gula, difficultads da respirar cun u senza fevra, sentiment da fevra u mal ils musculs e/u han pers l'odurat e/u il palat. Ellas ed els èn supplitgads da contactar la media u il medi da chasa resp. l'ospital regiunal cumpetent. Quests posts sclereschan, sch'i duai vegnir fatg in test sin COVID-19.

Il contact tracing fa effect
Il contact tracing è ina mesira efficazia per controllar e per franar infecziuns. Tras quai ch'ils contact tracers èn intervegnids svelt en cas da novas infecziuns, èsi stà pussaivel da controllar svelt las chadainas d'infecziun e d'impedir in'ulteriura derasaziun. Uscheditg ch'il contact tracing funcziuna, vegni desistì d'ordinar ulteriuras mesiras, sco per exempel l'extensiun da l'obligaziun da purtar ina mascrina en localitads accessibels al public.

Bunas experientschas ha l'Uffizi da sanadad fatg areguard l'observanza da l'obligaziun d'annunzia e da quarantina tar persunas che arrivan or da pajais da ristga en Svizra. Fin ussa èn passa 700 persunas s'annunziadas tar il post d'annunzia, principalmain dals pajais Bosnia ed Erzegovina, Cosovo, Serbia, Stadis Unids da l'America e Svezia.

L'Uffizi da sanadad appellescha vinavant a l'atgna responsabladad da la populaziun e renda attent che persunas che returnan or da pajais da ristga en Svizra ston s'annunziar er en l'avegnir tar il post d'annunzia.

En il Grischun sa chattan actualmain 19 persunas en isolaziun e var 49 persunas en quarantina. En ospitals na vegnan per il mument tgiradas naginas persunas.

Per il mument po la situaziun en il Grischun vegnir designada sco stabila. Tut ils posts involvids dumognan las incumbensas attribuidas, ed actualmain èn avant maun avunda resursas. Ils posts chantunals sa barattan cuntinuadamain cun las vischnancas, cun las federaziuns da branscha, cun ils chantuns vischins e cun la Confederaziun. Da la Confederaziun spetga il chantun ina meglra coordinaziun dal barat da datas necessari.


Infurmaziuns:
- cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch
- Marina Jamnicki, media chantunala, Uffizi da sanadad dal Grischun, tel. +41 81 257 26 46, e-mail Marina.Jamnicki@san.gr.ch


Gremi: Departament da giustia, segirezza e sanadad
Funtauna: rg Uffizi da sanadad

Neuer Artikel