Navigation

Inhaltsbereich

  • Erste Mitteilung
  • Neuen Beitrag einfügen

Pervia da las mesiras vertentas per cumbatter la pandemia da COVID-19 vegn il Cussegl grond a salvar er la sessiun d'avust dals 25 fin ils 28 d'avust 2020 en la Halla da la citad da Cuira.

En sia ultima sesida ha la Conferenza da las presidentas e dals presidents dal Cussegl grond decidì da salvar – pervia da la situaziun actuala da la pandemia da COVID-19 – er la sessiun d'avust 2020 en la Halla da la citad da Cuira. Suenter che gia la sessiun da zercladur 2020 aveva gì lieu en la Halla da la citad, pon ins sa basar questa giada sin in concept cumprovà. Ils custs da la nova sessiun ordaifer l'edifizi dal Cussegl grond dastgassan perquai sa reducir per circa la mesadad.

Puspè nagin public, però livestream...
Pervia da la situaziun actuala da la pandemia da COVID-19 ha la Conferenza da las presidentas e dals presidents puspè decidì d'admetter nagin public a la sessiun. Sco gia en la sessiun da zercladur 2020 vegn perquai in livestream a permetter da persequitar directamain las debattas dal Cussegl grond.

Per las collavuraturas ed ils collavuraturs da las medias stattan a disposiziun plazzas da lavur che adempleschan las prescripziuns vertentas da distanza e d'igiena. La rapportaziun en las medias è uschia garantida.

...e danovamain in plan da lavur bain chargià
La sessiun d'avrigl 2020 ch'è crudada or pervia da COVID-19 ha er consequenzas per la sessiun d'avust 2020: Suenter che la sessiun da zercladur era vegnida prolungada per 2 dis, survegn er la sessiun d'avust 1 di supplementar. Ella cumenza perquai gia mardi, ils 25 d'avust 2020. Las deputadas ed ils deputads grischuns vegnan a stuair s'occupar da tut en tut 9 fatschentas e 23 intervenziuns. Vitiers vegnan l'elecziun dal presidi dal Cussegl grond, l'elecziun dal presidi da la Regenza e las elecziuns per la renovaziun totala da las dretgiras chantunalas superiuras.

Nagina festa uffiziala
Plinavant ha la Conferenza da las presidentas e dals presidents decidì da desister quest onn – pervia da la situaziun actuala – da la festa uffiziala per il nov presidi dal Cussegl grond. Quest onn vegn la sessiun d'avust pia terminada il venderdi saira, ma a la fin da la sessiun vegn la presidenta nov elegida u il president nov elegì dal Cussegl grond onurada u onurà commensuradamain confurm a la dignitad da l'uffizi.


Infurmaziuns:
president dal Cussegl grond Alessandro Della Vedova, tel. +41 78 735 05 86


Gremi: Chanzlia chantunala
Funtauna: rg Chanzlia chantunala

Neuer Artikel