Navigaziun principala

Cuntegn da la pagina

La Regenza ha publitgà l'emprim Rapport davart l'efficacitad da la nova gulivaziun da finanzas

  • Erste Mitteilung
  • Neuen Beitrag einfügen

La refurma da la gulivaziun da finanzas en il chantun Grischun (refurma da la GF) è entrada en vigur il 1. da schaner 2016. Il sistem che valeva fin lura, cun ina gulivaziun da finanzas directa ed indirecta, è vegnì remplazzà cun in sistem da gulivaziun dal tuttafatg nov e modern. La Regenza ha elavurà per l'emprima giada in rapport che mussa l'execuziun e l'efficacitad da la gulivaziun da finanzas. En quest connex ha ella tratg in cler facit: il sistem da gulivaziun da finanzas ha success en il Grischun e cuntanscha las finamiras fixadas!

Il Rapport da la Regenza davart l'efficacitad mussa ch'ils instruments da gulivaziun han ina influenza legraivla. In effect positiv han gì ils instruments gulivaziun da las resursas, gulivaziun da las grevezzas geografic-topograficas e da scola sco er gulivaziun da las grevezzas socialas. Ultra da quai han las vischnancas profità dal nov sistem en tut las trais dimensiuns analisadas.

Execuziun e surveglianza da las finanzas funcziunan
Suenter in pèr difficultads il cumenzament da la midada al nov sistem da gulivaziun da finanzas èn vegnids adattads ils process entaifer l'administraziun, uschia che l'execuziun funcziuna ussa. Las difficultads derivavan da la midada da process da blers onns sco er da l'introducziun da novs instruments da calculaziun.

A medem temp cun la refurma da la GF è er entrada en vigur ina nova surveglianza da las finanzas da las vischnancas, che ha in effect preventiv. Er sche las vischnancas èn en emprima lingia responsablas per il svilup da las finanzas, po il chantun intervegnir en cas critics. Il dumber da las intervenziuns ch'il chantun ha prendì è restà zunt pitschen ed è sa restrenschì quasi exclusivamain sin quellas vischnancas che gia la gulivaziun da finanzas anteriura renconuscheva sco vischnancas "cun dretg sin gulivaziun dal basegn spezial".

Regenza vesa anc spazi per meglieraziuns
Schebain che la gulivaziun da finanzas funcziuna fitg bain, propona la Regenza intginas midadas en il rom d'ina revisiun parziala da la Lescha davart la gulivaziun da finanzas. Intginas rectificaziuns formalas, las taglias a la funtauna sco er las taglias sin il gudogn e sin il chapital duain vegnir resguardadas da nov mo pli per il pe da taglia ch'è vegnì fixà dal Cussegl grond. En connex cun la realisaziun da la refurma fiscala federala e da la finanziaziun da la AVS (RFFA) en il chantun duai la Regenza plinavant survegnir la pussaivladad da reducir ils meds finanzials da la gulivaziun da resursas. Quai duai permetter da suttametter la gulivaziun da resursas pli fitg a la taglia. In'ulteriura adattaziun pertutga la prescripziun da las vischnancas da stuair far ina contabilitad per la gulivaziun da las grevezzas da scola. En l'avegnir duain quests meds finanzials vegnir distribuids senza intents specifics. Ultra da quai duai vegnir stgaffida la basa giuridica formala per restituir contribuziuns nungiustifitgadas da la gulivaziun da las grevezzas socialas e per curreger posteriuramain calculaziuns fallidas da la gulivaziun da las grevezzas geografic-topograficas e da scola.

Il Cussegl grond vegn a tractar il project previsiblamain en la sessiun d'october 2020.


Agiunta:
missiva


Infurmaziuns: 
- president da la Regenza dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
- Thomas Kollegger, manader da l'Uffizi da vischnancas, tel. +41 81 257 23 81, e-mail Thomas.Kollegger@afg.gr.ch 


Gremi: Regenza
Funtauna: rg Departament da finanzas e vischnancas

Neuer Artikel