Navigaziun principala

Cuntegn da la pagina

Meglieraziun generala da Mustér: Las lavurs da construcziun vegnan cuntinuadas tenor plan

  • Erste Mitteilung
  • Neuen Beitrag einfügen

Las lavurs currentas da la meglieraziun generala da Mustér vi da la via champestra Disla – Madernal (via da communicaziun istorica) èn vegnidas crititgadas publicamain las ultimas emnas. A chaschun d'ina inspecziun tras l'Uffizi d'agricultura e da geoinfurmaziun ensemen cun la patruna da construcziun sco er cun ils posts spezialisads cumpetents da la Confederaziun e dal chantun èsi vegnì constatà che las lavurs vegnan exequidas tenor il project approvà giuridicamain valaivel ed observond tut las cundiziuns. Uschia pon las lavurs da construcziun vegnir cuntinuadas sco planisà.

En il rom da la meglieraziun generala currenta da Mustér duai la via da communicaziun istorica Disla – Madernal d'ina vart puspè vegnir attribuida ad in'utilisaziun agricula segira. Da l'autra vart ston vegnir reparads e tgirads ils elements prezius, sco mirs sitgs e saivs vivas, che van actualmain en decadenza. Uschia vegn mantegnì il maletg al lieu e salvada la substanza architectonica istorica. Correspundentamain eran vegnidas formuladas cundiziuns voluminusas en l'approvaziun dal project dals 16 d'avrigl 2018.

Il cumenzament d'avust 2020 han differentas persunas privatas ed organisaziuns crititgà la renovaziun da la via champestra. Uschia èsi vegnì fatg valair a maun da fotografias ch'i vegnia cuntrafatg a cundiziuns essenzialas dal project approvà e ch'i manchia il quità necessari per proteger ils elements da la via da communicaziun istorica. 

Las lavurs correspundan al project approvà
En il rom da la funcziun da surveglianza da l'Uffizi d'agricultura e da geoinfurmaziun (UAG) per l'execuziun da las lavurs da meglieraziun ha gì lieu ils 5 d'avust 2020 ina inspecziun dal plazzal en cunvegnientscha cun la patruna da construcziun. Là èsi sa verifitgà ch'il traject da la via en dumonda n'è insumma anc betg vegnì tangà fin ussa. Las lavurs da construcziun stevan airi per raschuns da vacanzas. Ils 17 d'avust 2020, anc avant che las lavurs da construcziun èn vegnidas recumenzadas, ha gì lieu in'ulteriura inspecziun cun tut ils posts spezialisads cumpetents sin plaun chantunal e federal. En quest connex èsi vegnì constatà che las lavurs èn vegnidas exequidas enfin ussa tenor il project approvà e tenor las cundiziuns fitg detagliadas ch'èn cuntegnidas en questa approvaziun. Il proceder planisà per mantegnair ils mirs sitgs correspunda al project approvà. Las mesiras planisadas vegnan perquai accumpagnadas stretgamain da la Tgira chantunala da monuments, da l'accumpagnament ecologic da construcziun, da la direcziun dal project e dal UAG. L'Uffizi federal da vias (UVIAS), ch'è cumpetent per las vias da communicaziun istoricas, vegn medemamain cumpiglià en la realisaziun al lieu. 

La patruna da construcziun e las autoritads èn fitg conscientas da l'impurtanza da la via e realiseschan il project cun il quità correspundent.

Sin basa da questas constataziuns ed en cunvegnientscha cun la delegaziun da las represchentantas e dals represchentants da la Confederaziun e dal chantun è il UAG vegnì a la conclusiun ch'i na dovra naginas mesiras da correctura e che las lavurs pon vegnir cuntinuadas tenor plan e sco previs en il project approvà ed en las cundiziuns ch'èn cuntegnidas en questa approvaziun.


Infurmaziuns:
Daniel Buschauer, manader da l'Uffizi d'agricultura e da geoinfurmaziun, tel. +41 81 257 24 31, e-mail Daniel.Buschauer@alg.gr.ch (cuntanschibel per telefon tranter las 14.00 e las 15.00)


Funtauna: rg Uffizi d'agricultura e da geoinfurmaziun
Gremi: Uffizi d'agricultura e da geoinfurmaziun

Neuer Artikel