Navigaziun principala

Cuntegn da la pagina

Er l'onn 2019 è la populaziun sa sviluppada differentamain da regiun a regiun

  • Erste Mitteilung
  • Neuen Beitrag einfügen

Ils 31 da december 2019 dumbrava il chantun Grischun 199 021 abitantas ed abitants, 642 dapli che l'onn precedent. Il svilup regiunal è fitg different.

La populaziun grischuna è creschida l'onn 2019 cun 0,32 pertschient quasi tuttina sco ils onns precedents. Er l'onn passà è il svilup stà sut la media envers la creschientscha naziunala da 0,72 pertschient. Ratas da creschientscha pli pitschnas ch'en il Grischun han registrà l'onn 2019 ils chantuns Sursilvania e Giura, entant che l'Appenzell Dadens, Neuchâtel, Sutsilvania e Tessin han schizunt preschentà in svilup negativ da la populaziun. Da l'autra vart è la populaziun dals chantuns Turitg, Argovia e Turgovia creschida il pli fitg cun mintgamai passa in pertschient.

La creschientscha sa concentrescha sin las axas principalas
L'augment il pli ferm da la populaziun en il chantun han registrà l'onn passà las regiuns Plaun, Viamala e Moesa. Er Landquart e Plessur han contribuì a la creschientscha. Las diminuziuns las pli grondas han percunter pudì vegnir registradas en Surselva ed en la Val d'Alvra.

Abitantas ed abitants da las regiuns en il Grischun: midadas procentualas 2019 e populaziun per ils 31-12-2019

Da las 15 vischnancas cun passa 3000 abitantas ed abitants èn creschidas il pli fitg l'ultim onn Panaduz, Maiavilla e Tusaun. Entaifer questa gruppa da las vischnancas grischunas las pli grondas han San Murezzan, Puschlav, Tavau e Claustra registrà in regress da la populaziun.

Main naschientschas, fitg grondas differenzas migratoricas
1630 naschientschas han fatg frunt l'onn passà a 1748 mortoris; mo en quatter da las indesch regiuns hai dà in surpli positiv da naschientschas. Il lev augment da la populaziun sa basa pia er l'onn 2019 quasi exclusivamain sin il saldo da migraziun internaziunal ch'è positiv dapertut. Il saldo interchantunal che mussa ils moviments da migraziun cun auters chantuns, è tut en tut negativ sco ils onns precedents. Intginas regiuns sco Moesa u Landquart pon dentant registrar qua in augment. Dapli influenza sin ils svilups regiunals han ils moviments che sa guliveschan tut en tut entaifer il chantun: Ils saldos intercommunals cleramain positivs cunzunt en las regiuns Grischun dal nord e Viamala reflecteschan l'emigraziun predominanta or d'autras regiuns.

Cumponentas dal svilup da la populaziun en las regiuns dal Grischun, 2019

Main Portugais e Tudestgs
Per la fin da l'onn 2019 abitavan 37 382 abitantas ed abitants da naziunalitad estra en il Grischun, 400 dapli che l'onn precedent. Entant ch'il dumber da Portugais e da Tudestgs sco gruppa la pli gronda è sa reducì levamain, è il dumber da burgais talians ed austriacs s'augmentà. Er vegnan dumbradas dapli abitantas ed abitants da la gronda part dals pajais da la UE da l'ost. 387 persunas han acquistà il dretg da burgais svizzer l'onn passà.

Ils detagls davart la populaziun e davart ils svilups demografics da tut las vischnancas e da tut las regiuns sco er ulteriuras infurmaziuns stattan a disposiziun sin la pagina d'internet da l'Uffizi per economia e turissem (guardar Statistik und Register).


Infurmaziuns:
Patrick Casanova, manader da la partiziun Statistica e registers, tel. +41 81 257 23 74, e-mail Patrick.Casanova@awt.gr.ch


Gremi: Uffizi per economia e turissem
Funtauna: rg Uffizi per economia e turissem

Neuer Artikel